唔少媽媽朋友同我講,長輩喺家庭聚會對小朋友有以下舉動:
①畀錢買嘢食。
②會講「你大個記住搵多啲錢呀!」、「快啲出嚟幫手搵錢啦!」
③煮貴少少嘅餸,就話「好貴㗎!你快啲食晒佢呀!」

長輩畀錢要克制
其實,上一代如果唔係同小朋友一齊住,見面畀$10、$20買嘢食,表達愛錫同關心,係人之常情。雖然只係好細數目,不過小朋友唔識得分辨錢多錢少,如果小朋友好識睇眉頭眼額,一知道扭吓計或者嗲吓就得到更多,就會慣咗不勞而獲,久而久之會縱壞咗。

眾籌樂趣多
Keicy慢慢大個,開始對金錢有概念,所以更加要灌輸正確嘅價值觀,譬如我有同兩姊妹約法三章:嗰日乖或者表現好,會奬一個印仔。一個月儲夠指定數量印仔,就有$5、$10或者$20,啲錢可以儲起佢或者直接拎去買支筆、買包糖,更歡迎兩姊妹夾份買貴少少嘅禮物一齊分享,一齊玩。

financialplanning_2

建立精明消費態度
佢哋試過每人夾$10,總共$20買包朱古力奶加一包細薯片分甘同味,我亦都趁機會同佢哋講,好多人都冇嘢食,所以唔可以浪費食物,要「食得晒,先好嗌」,唔可以貴嘅食物就要食晒,普通嘅嘢食就可以擺喺度。

揀獎勵禮物嗰陣,我會問:「係咪真係需要呢樣嘢呢?」,並要求佢哋揀一樣有用兼屋企冇嘅嘢,要話講得出用嚟做乜,嚟培養佢哋消費前要諗清楚。

例如屋企已經有一盒顏色筆,3姊弟除咗唔可以揀佢做獎勵禮物,要用嘅時候,每人每次只可以攞2至3支,用完先換顏色,咁就唔會爭住用,其他用品同玩具都係同一模式處理。

不過有啲家長為咗囝囡唔使爭,玩具、顏色筆等所有嘢都係一人一份,家長要用好多錢之餘,屋企仲會堆積唔少雜物,咁係冇按實際需要消費,係唔好嘅示範,更令小朋友唔識得分享。

培養儲蓄習慣
Keicy會去學校嘅小食部買嘢食、鉛筆或者小玩意,佢間中都會問我攞錢買,不過我唔會次次都俾,以免佢自細就習慣「攤大手板」,所以我鼓勵佢做家務嚟賺錢,例如掃地、抹檯、洗碗、倒垃圾等簡單家務,每次一蚊,培養儲錢嘅概念同習慣,建立「付出先有收穫」嘅意識。

financialplanning_11-1050x1400

家長以身作則
而家周圍都可以用八達通畀錢,小朋友比較少見倒現金交易,唔太知道物品幾貴幾平,容易對金錢缺乏概念,所以我盡量唔會喺佢哋面前用電子貨幣畀錢,更會叫佢哋企定定喺我隔離,睇住我用現金交易,順便加深佢哋對紙幣同硬幣嘅認識。

現時小朋友扭計要買嘢,唔可以剩係講:「冇錢,唔買!」,家長需要灌輸正確嘅金錢價值觀,如果唔係, 就算小朋友如長輩所願,好快出社會搵錢,都會容易被金錢牽住鼻子走。

想知更多育兒資訊 請留意Easy Pama


fionaFiona
育有Keicy、Kassy同Par Par嘅我,3姊弟有晒小學、幼稚園同playgroup經歷,四年抱三令我一次過「儲齊晒」其他人喺唔同時間經歷嘅事,亦因為有好多人問我育兒、揀學校等資訊,所以我將三個囝囡嘅成長片段同點滴,透過 blog同Facebook Page開心share!我唔係咩都識,唔係一個完美媽媽,但我盡全力令3姊弟有完美嘅童年生活,希望將來我老咗嘅時候,可以同佢哋一齊笑住講返舊時啦!

連結﹕Keicy Wu 胡梓盈

物質充裕 更要灌輸正確金錢價值觀
想隨時獲得更多親子資訊,就快啲like我哋Facebook啦!⁠⁠⁠⁠

Post navigation