每日一擘大眼就睇得見四周所有嘢,唔係理所當然,為咗令 Keicy 識得保護自己嘅眼睛,愛護自己嘅身體,所以同佢玩個小遊戲,體驗視障人士睇唔到嘢嘅苦困。

WhatsApp-Image-2017-10-09-at-8.04.22-PM

呢個小遊戲,好似玩麻鷹捉雞仔咁樣,用塊布遮住 Keicy 雙眼,跟住要佢蒙住雙眼做一啲事。首先係寫字。Keicy未開始寫就話:「咁咪冇得揀顏色筆囉!」,跟住,佢又要摸吓支筆喺邊度,慢慢開蓋,之後唔少得寫錯字啦,啲字亦都寫得唔靚,忽高忽低,唔可以寫成直線。

WhatsApp-Image-2017-10-09-at-8.04.25-PM(1)

除此之外,因為冇咗空間感,所以冇辦法預位,Keicy以為自己已經寫滿咗張卡,其實原來仲有好多位,中途更加冇得揀顏色。

WhatsApp-Image-2017-10-09-at-8.04.25-PM(3)

小遊戲嘅第二部分,係試食乳酪。Keicy要靠觸覺摸一輪先至可以打開,冇平時咁方便,而且,當佢攞起隻匙羹想「筆」嚟食嘅時候,又要花一輪時間搵啱個位。另外,因為雙眼蒙住咗,所以就算我擺兩三杯唔同味道嘅乳酪喺Keicy面前,佢都揀唔到,要食落口至知道嗰杯乳酪係乜嘢口味。

WhatsApp-Image-2017-10-09-at-8.04.25-PM(2)

Keicy之後仲話:「蒙住眼食乳酪嘅時候,一直擔心乳酪會跌落地下,當睇唔到放入口嘅係乜嘢食物,睇唔到食物係乜嘢顏色,原來係咁得人驚。」

WhatsApp-Image-2017-10-09-at-8.04.26-PM(1)

而家好多小朋友細細個就戴眼鏡,有機會可能因為喺睇電視、做功課嘅時候冇注意光線係咪充足,除此之外,部分家長會將電視、手機、平板電腦視為電子奶嘴,令小朋友坐定定,不過小朋友經常對住電子屏幕,其實係好傷眼睛,所

以我除咗盡量唔畀屋企3姊弟接觸電子屏幕產品外,更從多方面入手,保護佢哋嘅靈魂之窗。

譬如:
1. 放假去多啲戶外活動,加速血液循環,保持身心愉快,睇多啲綠色植物
2. 早睡早起
3. 閱讀時,環境要夠明亮,坐姿亦要正確,每隔40分鐘要休息、遠望
4. 注意衛生,唔好經常捽眼
5. 定期做視力檢查
6. 食多啲對眼晴好嘅食物,例如魚類、蔬果(紅蘿蔔同藍莓),避免鉻、鈣等微量元素缺乏。

因為紅蘿蔔同藍莓味道鮮甜,無論榨果汁或者做沙律,小朋友都會好鍾意。我間中又會用菊花、杞子嚟焗水,入落保溫壺帶出街飲,係低糖、甘甜又補眼嘅健康之選!
希望呢次蒙眼體驗,能夠令Keicy Kassy 兩姊妹知道雙眼係非常重要,學識更加珍惜視力,珍惜佢哋而家擁有健全、健康嘅身體,喺成長路上,飽覽美麗風光。

想知更多育兒資訊 請留意Easy Pama


fionaFiona
育有Keicy、Kassy同Par Par嘅我,3姊弟有晒小學、幼稚園同playgroup經歷,四年抱三令我一次過「儲齊晒」其他人喺唔同時間經歷嘅事,亦因為有好多人問我育兒、揀學校等資訊,所以我將三個囝囡嘅成長片段同點滴,透過 blog同Facebook Page開心share!我唔係咩都識,唔係一個完美媽媽,但我盡全力令3姊弟有完美嘅童年生活,希望將來我老咗嘅時候,可以同佢哋一齊笑住講返舊時啦!

連結﹕Keicy Wu 胡梓盈

體驗漆黑一片 珍惜視力
想隨時獲得更多親子資訊,就快啲like我哋Facebook啦!⁠⁠⁠⁠

Post navigation