只有正面打扮的萬聖節

萬聖節就快到,要為 Keicy同細佬妹準備定 party著嘅衫以及打扮,不過我想3姊弟喺2017年嘅10月尾,做啲新嘗試:著天使裝,以及其他正面打扮示人,唔做吸血殭屍、巫婆、無面男等「黑暗系列角色」。

WhatsApp-Image-2017-10-23-at-7.46.27-PM

咁做,並唔係唔俾佢哋慶祝萬聖節,而係覺得,應該開始要俾佢哋知道,任何時候做任何事,都要保持正面,唔可以因一時高興,打扮成吸血殭屍、巫婆等不健康形象來嚇人,從而影響其他人。
相傳,萬聖夜起源於不列顛凱爾特人嘅傳統節日,佢哋相信,10月嘅最後一日,係夏天嘅終結,冬天嘅開始,呢日係一年嘅重要標誌,係最重要嘅節日之一,被稱為「死人之日」,或者「鬼節」。呢日各種惡鬼會出沒,去死嘅人嘅靈魂,亦都會離開陰間,喺世間遊走,呢一晚會特別危險。為了嚇走邪惡嘅鬼魂,凱爾特人會戴上面具。

WhatsApp-Image-2017-10-23-at-7.47.08-PM

嚟到今時今日,商家為咗鼓勵消費,會將萬聖節包裝到好可愛咁樣,所以如果只喺呢個節日扮吓卡通人物,完全可以接受,當大家一齊玩吓,不過我唔會特登去慶祝呢個日子,因為似係高舉緊一啲負面嘅嘢。
如果3姊弟同我講:「其他人個個打扮晒,又有糖食,我好想好似佢哋咁呀」嘅時候,我會話:「媽媽細個啲嘅時候,都有同朋友一齊扮吸血殭屍、扮巫婆,以誇張打扮同妝容出席朋友嘅party,不過咁做其實可能會嚇親人㗎,就算喺萬聖節“普天同慶”,點都會影響到其他人,所以最好唔好咁做。」
咁樣比起say no,一來唔會掃興,二來可以增加3姊弟嘅同理心,知道自己想開心同好玩,係唔可以靠嚇人嚟得到,三來唔會令佢哋聚焦呢個節日係源自一啲唔好嘅嘢。

我明白,好多人都認為萬聖節扮鬼扮馬,都係「趁節日玩吓啫」,不過我慢慢知道咗佢背後嘅意義之後,真係唔太想慶祝,而且現今普遍大眾對萬聖節嘅睇法,會潛移默化咁樣影響小朋友,佢哋就會接受包裝過嘅事,將注意力集中喺鬼怪、巫婆同吸血殭屍等「黑暗系列角色」身上,可能會令佢哋日後比較重視負面嘅事物,多過重視一啲光明正面嘅嘢。

WhatsApp-Image-2017-10-23-at-7.45.49-PM

如果小朋友堅持要扮鬼怪、巫婆同吸血殭屍,同其他人一齊去嚇人,身為家長,其實真係阻止唔到,始終佢哋有自由咁做,呢個時候唯有循循善誘,慢慢講解,令佢哋明白箇中原由,如果當扯線公仔咁樣控制,就唔係真係錫佢哋,因為小朋友長大之後,會唔識得尋根究柢,唔識得自己做選擇。

想知更多育兒資訊 請留意Easy Pama


fionaFiona
育有Keicy、Kassy同Par Par嘅我,3姊弟有晒小學、幼稚園同playgroup經歷,四年抱三令我一次過「儲齊晒」其他人喺唔同時間經歷嘅事,亦因為有好多人問我育兒、揀學校等資訊,所以我將三個囝囡嘅成長片段同點滴,透過 blog同Facebook Page開心share!我唔係咩都識,唔係一個完美媽媽,但我盡全力令3姊弟有完美嘅童年生活,希望將來我老咗嘅時候,可以同佢哋一齊笑住講返舊時啦!

連結﹕Keicy Wu 胡梓盈

只有正面打扮的萬聖節
想隨時獲得更多親子資訊,就快啲like我哋Facebook啦!⁠⁠⁠⁠

Post navigation