Keicy最近換牙,原本以為佢同好多小朋友一樣,覺得棚牙有個窿好核突、好尷尬,唔肯露齒笑,點知佢成個諧星咁樣,見親人都掹大個口,依起棚牙,仲有好多古靈精怪嘅主意,於是我把握機會,激發佢更多思考同創作。如果咁啱您嘅小朋友都係換緊牙,不妨趁呢個機會,更深入認識佢哋,以及用適合嘅方法,灌輸正確嘅牙齒知識。

04

早前十號風球,吹走Keicy隻門牙,當我畀佢食完冰凍雪糕,舒緩痛楚後,佢就走入房,將隻牙放入個好靚嘅樽裡面好好保存。呢個行為,代表佢知道失去咗身體嘅一部份,但仍然好珍惜,所以我鼓勵佢畫一幅畫紀念呢隻門牙,仲同佢講:「呢隻牙喺你細個嗰陣,幫過你好多忙,要多謝佢呀!」
我打鐵趁熱,同佢講外國有關牙齒嘅風俗──聽講外國人換牙,會將牙齒收喺枕頭下低,第二朝起身,牙齒就會變成錢幣,因為妖精用咗魔法,不過可惜,我哋唔係外國人。

01

 

畫入面個嘴角噴晒血,可能佢幻想自己係一隻妖精呀哈哈!

換牙可以係作畫嘅好題材,家長們不妨向小朋友講吓小故事,或者自己小時候嘅經歷,會有助刺激佢哋思考,創作出更豐富嘅作品。
見Keicy畫完畫後若有所思,我向佢灌輸一啲正確嘅牙齒資訊──因為之後唔會再換牙,如果唔好好照顧,就會蛀牙,到時就要好似長者咁樣裝假牙。估唔到我咁正經講完,當晚食飯,佢用筷子夾一粒粟米放喺個口前面,話要用粒粟米嚟做佢甩咗嗰隻牙;飲果汁嗰陣,Keicy又將飲筒插落甩咗隻牙個窿度,發出奇怪聲音,真係唔知畀佢嚇死,知道畀佢笑死呀!

03

甩完牙成日扮殭屍

見到小朋友創意大爆發,身為家長當然高興,所以買咗個baby tooth box,畀Keicy裝好佢甩出嚟嘅乳齒,培養佢要愛物惜物,更用身教,令佢知道以後應該點樣做好收納。
颱風過後,婆婆嚟咗屋企,Keicy即刻拎個baby tooth box畀佢睇,仲話:「我要留起晒啲牙,等自己老咗,用佢哋嚟做假牙。」個心離一離嘅婆婆聽完,只係講咗一句:「你啲收藏品幾得意喎。」然後望住我笑一笑,呢一刻,佢應該諗緊,我細個換牙都係同Keicy一樣,講埋晒啲無厘頭嘅嘢。
可能喺好多家長眼中,小朋友換牙好正常,佢哋天馬行空亦係家常便飯,但係我認為,隨咗要留意小朋友換牙時嘅口腔衛生,牙齒係咪整齊等生理問題外,更要趁呢個機會,引導佢哋思考,發揮創意,同時灌輸正確牙齒知識,令佢哋安心面對呢個人生必經階段。

阿妹細佬就係例子,佢哋見證家姐整個甩牙過程後,完全唔驚,阿妹仲好雀躍咁成日問:「我幾時甩牙呀?」

05
「期待甩牙」嘅童真,一世人只有一次,過咗就冇,需好好珍惜。

想知更多育兒資訊 請留意Easy Pama


fionaFiona
育有Keicy、Kassy同Par Par嘅我,3姊弟有晒小學、幼稚園同playgroup經歷,四年抱三令我一次過「儲齊晒」其他人喺唔同時間經歷嘅事,亦因為有好多人問我育兒、揀學校等資訊,所以我將三個囝囡嘅成長片段同點滴,透過 blog同Facebook Page開心share!我唔係咩都識,唔係一個完美媽媽,但我盡全力令3姊弟有完美嘅童年生活,希望將來我老咗嘅時候,可以同佢哋一齊笑住講返舊時啦!

連結﹕Keicy Wu 胡梓盈

天馬行空 助兒童樂觀面對換牙
想隨時獲得更多親子資訊,就快啲like我哋Facebook啦!⁠⁠⁠⁠

Post navigation