小朋友放咗一個好長嘅暑假,終於要返嚟現實世界,而我喺開學呢兩個幾星期,嘗試一啲新做法,有條理咁樣應對三姊弟開學,結果大致順利,大人細路都忙得好開心!希望以下提供嘅方法,能夠幫助覺得焦慮嘅家長同小朋友。

keicy01

1.把握時間 細心聆聽
通常開學初期會早啲放學,返一日嘅就返住半日先,返幾個鐘頭嘅,就可能返住一個鐘頭先,建議爸爸媽媽用多出嚟嘅時間,聆聽小朋友嘅「開學小故事」, 因為佢哋會好興奮,分享有咩新同學、新老師,只要家長善意回應,小朋友自然覺得校園生活有趣,會更鍾意返學。

2.唔好急 慢慢閱讀通告
另外,開學第一日都會有大量通告,我會比平時睇得更慢,肯定睇清楚裡面嘅內容,確保收到晒學校畀家長嘅每一個訊息。

3.先溫書 再做功課
我另一個常態小嘗試,係3姊弟平時做功課前,都先用大約15至30分鐘,為佢哋重溫當日學過嘅內容,幫助加深記憶,當佢哋習慣咗,喺考試、測驗嘅時候,就唔會好似乜都唔識咁樣,要重新溫習過咁辛苦、咁大壓力。

4.學識放手 培養囝囡責任感
好多人都話而家有好多「直升機家長」,即係囝囡一個電話,或者一個短訊,就即刻「使命必達」,咁樣會令小朋友唔識得成長。例如今年升二年級嘅Keicy, 日常好多事都嘗試交返畀佢自己處理,例如執書包、自己跟功課,因為始終已經讀咗一年小學,有些少底子,所以我唔需要坐定定喺佢隔離,無論做功課定係執書包,都係等佢自己完成晒先,我跟住再對一次,咁樣可以令小朋友知道,自己應該要做乜嘢,知道要有責任感,如果家長唔學習放手,除咗自己辛苦,小朋友亦都更難完成未來嘅挑戰。

5.學習環境轉變 家長陪同好重要
不過同一個標準,唔適用喺每一個囝囡身上,新學期開始,我要坐定定喺Kassy隔離,因為Kassy下年升小一,要幫佢做足準備,應付難度高啲啲嘅 K3課程。以學習階段嚟講,K3同小一嘅小朋友,係特別需要家長花更多時間陪同及鼓勵,因為學習環境將會或已經唔同咗,循循善誘可以幫助佢哋保持比較輕鬆嘅心情學習。

keicy02

6.識自理 K1生活更自在
今年,細佬Par Par都上K1喇,根據兩位姐姐嘅經驗,呢個年紀嘅學童,主要係鍛鍊手部小肌肉,以及辨認顏色等等,所以唔需要太擔心功課,反而幼稚園對小朋友嘅自理能力要求,會比學前班高,所以家長可以加強訓練小朋友嘅自理能力,例如學識自己食點心,以便佢哋更容易面對陌生環境,過新嘅群體生活紀律。

7.預先打底 返學唔會喊
第一日返幼稚園嘅小朋友,喺校門攬實媽媽狂喊嘅情景,每年開學都會發生,其實細路仔出現呢個情況好正常,始終係同至親「分開」,不過如果可以預先打底,囝囡早啲適應,就唔使開學日變成傷心日,例如,將小朋友交畀其他親人照顧一兩個鐘頭,臨走前同佢哋解釋,爸媽一定會返嚟;又或者,同小朋友玩「扮返學」遊戲,由家長扮演老師,令囝囡知道學校、老師係點樣樣。

8.家長注意自己情緒
爸媽愈緊張,小朋友一定會被感染,所以性急嘅我會不斷提醒自己「慢慢嚟,放鬆啲」,包容囝囡嘅小過錯,包容囝囡有時分數唔理想,因為家長太嚴厲督促功課同溫習,小朋友就會覺得返學係唔開心嘅事,影響佢哋嘅學習動機。

除此之外,建議各位爸爸媽媽抽時間做自己鍾意嘅事,平衡分配工作、家庭同私人時間,全天候對住囝囡,會容易鑽牛角尖,愈嚟愈唔滿意小朋友做嘅每一件事。

做好心理準備、家長同小朋友要負乜嘢責任、點樣平衡學習同生活,都係身為媽媽嘅我,每年開學前都要思考嘅事,我亦都相信,只要安排妥當有條理,小朋友就可以學習得更好,更鍾意返學!

想知更多育兒資訊 請留意Easy Pama


fionaFiona
育有Keicy、Kassy同Par Par嘅我,3姊弟有晒小學、幼稚園同playgroup經歷,四年抱三令我一次過「儲齊晒」其他人喺唔同時間經歷嘅事,亦因為有好多人問我育兒、揀學校等資訊,所以我將三個囝囡嘅成長片段同點滴,透過 blog同Facebook Page開心share!我唔係咩都識,唔係一個完美媽媽,但我盡全力令3姊弟有完美嘅童年生活,希望將來我老咗嘅時候,可以同佢哋一齊笑住講返舊時啦!

連結﹕Keicy Wu 胡梓盈

媽媽有條理 開學不焦慮
想隨時獲得更多親子資訊,就快啲like我哋Facebook啦!⁠⁠⁠⁠

Post navigation