教養之道
闊別五年復出樂壇 關心妍(上):做咗媽媽都要學識抽離!

 

2016年七月,關心妍從「關家姐」榮升做「關阿媽」,兩年多來全心全意照顧女兒楊榮心(Jovia)。下個月心心將滿三歲,關心妍宣布復出樂壇、飛到去台灣拍MV出新歌,又公布一連串內地巡迴演唱會行程。關心妍說,依然愛唱歌,對歌迷有責任,一直希望說到做到一圓在內地城市開個唱的夢,不過這次復出不同以往:「做媽媽要有自己生活識得抽離,不過萬大事都係個女行行,全公司都知開工schedule要就住心心,時間就得好,有時飛完心心都唔覺我離開過!」

image1

image2

正職媽媽副業唱歌
剛剛推出新歌〈時刻〉,又宣布下月在廣州舉行個人演唱會,拍MV、宣傳、開會、練歌還有綵排,你以為忙到出煙有家歸不得,關心妍說其實有得安排也要懂分輕重緩急:「星期一至五我照常湊佢起身、送佢返學、煮嘢俾佢認字咭讀故事全部都親自做,一早同公司適量好周末至安排工作俾我,就算係咁,周末如果有學校活動,都係心心優先!其實對心心嚟講改變不大,有時都唔覺我離開過,平時我都係星期一至五湊女,每逢周六就俾佢喺爺爺嫲嫲或者婆婆屋企過,我同老公管得嚴規矩多,周末就俾心心放吓假、又俾爺爺嫲嫲同婆婆同佢玩吓縱吓佢。復出之前我都有搞自己慈善基金、有教唱歌,有時星期六日又爭取時間同老公二人世界拍吓拖,我覺得就算做咗媽咪,都唔使24小時on call全世界都只得個女。媽媽都要有興趣、有追求、學識分配時間又唔可以忽略另一半,對個女嚟講都係好事,學識爸爸媽媽都唔係隨傳隨到,識得珍惜同我哋相處。」

image3

image4

持之以恆略見小成
其實年半之前已經和關心妍做過訪問,當時印象最深刻就是關心妍教女有一套,另一半更是嚴父,從小就訓練心心獨立食飯甚至面壁培養專注和獨立,年半過去,關心妍話真係正確選擇影響深遠:「又未去到面壁咁嚴重嘅,而係唔會俾大人姐姐圍住佢、攞走玩具同書、唔俾咁多嘢影響,希望佢就係專法食完自己餐飯,要玩要走食完先講。講真食飯睇手機開電視本來都唔應該,我哋一家人食飯,最鍾意傾偈,啱啱開始返幼稚園,聽吓佢講學校發生咗咩。希望各位家長都相信,持之以恆,由細set啲rules真係會有收穫,我都好開心見到成果。喺屋企佢一定好專心食完自己餐飯離落地,出外就更加好使好用,旅行在外,尤其係同啲老人家一齊,大人未食完,心心都唔會離座扭計,好自律食完識得自己攞玩具出嚟消磨時間。有時特別場合,人多又傾偈,一餐飯食幾個鐘,我都要有預備,帶定啲書、玩具同畫簿,當然都有花時間同心機,大人傾偈社交,有時咪同老公換班陪心心,呢樣玩完攞第二樣出嚟,同佢玩仲可以乘機又教佢從生活中學多啲!」

預告:37歲才生女,關心妍說一直都深知等到心心長大,自己也已經不年輕。既然不可能永遠陪在心心身邊,所以即使不到三歲,這個媽媽還是刻意讓女兒學會獨立做選擇,更要從中學習承受每個選擇的後果。

image5

 

想知更多育兒資訊 請留意Easy Pama

 

 

想隨時獲得更多親子資訊,就快啲like我哋Facebook啦!⁠⁠⁠⁠
推介內容
event_latest