教養之道
新手爸媽玩爭寵? 陳智燊(上):老婆同個仔一樣錫!

拍拖九年,16年拉埋天窗,去年八月,長子Damon出世,陳智燊和宋熙年這一對一直恩愛閃爆娛樂圈,直到做了父母,竟然傳出兩人爭抱仔、為Damon爭寵傳聞?爸爸媽媽們,你懂的,肥肥白白又得意、每日長大每日進步,寶貝仔抱上手又點捨得放?不過Jason陳智燊就話,兒子出世以後,真正體會甚麼是家,三個人為一體,無論去到邊,老婆同個仔一樣咁掛!

一心生夠四個
兒子Damon才剛剛七個多月,陳智燊和太太宋熙年已經常被追問幾時追多個,Jason話喎,一直希望擁有大家庭,生多幾個是必須的:「我屋企有四兄弟,由細到大一齊玩大嘈大好熱鬧,我係不嬲都想有個大家庭,覺得一個屋企起碼要有四個朋友先至正常。不過香港地難啲,睇能力行事,呢一刻最緊要努力搵奶粉錢先。Damon仲細,呢個時候好好玩要享受眼前,同埋屋企多咗個BB,兩公婆生活作息都仲適應緊。好好笑,每日好似打仗咁,做嘢出街沖涼去厠所都要輪流分配好時間,最緊要個仔瞓醒、需要我哋時一定有個standby!兄弟姊妹感情對小朋友成長好重要,不過懷孕坐月照顧初生太困身,俾太太抖吓、做吓自己嘢先啦!」

image1

image2

抱仔唔肯放手
做了爸爸以後,每次出席公開場合都愛把兒子掛在口邊,個人社交帳戶例牌曬仔成狂,見到老婆抱住囝囝瞓有仔萬事足流露無邊醋意?其實呢個爸爸都係撒吓嬌啫:「Damon呢個時候好好玩、好多互動,屋企成日有個畫面好好笑,就係我同老婆一返屋企,鎖匙手袋掉埋一邊,第一件事都係衝去抱仔先!由兩夫妻,到多咗個家庭成員,呢一刻,當然個仔喺我哋心目中係第一位,但係我同Sarah 都係喎,從來唔會為咗Damon冷落另一半。有時出trip,心掛掛個仔唔知做緊乜,知道老婆同佢一齊,就自然想像到個畫面會好溫馨,覺得好放心。我次次出post都好鍾意hashtag『love and family』,就係因為做咗爸爸以後,家的概念特別強,同老婆關係感情更緊密,根本三為一體,無得分割!」

image3

image4

預告:一個慢熱、一個熱情,一個隨心、另一個則充滿計劃,一凹一凸天生一對,陳智燊所以說遇到宋熙年是他加入電視台最大的收穫。性格不一樣,教養方式和對兒子的期待,Jason則說兩公婆方針一致。

 

想知更多育兒資訊 請留意Easy Pama

想隨時獲得更多親子資訊,就快啲like我哋Facebook啦!⁠⁠⁠⁠
推介內容
event_latest