教養之道
全職媽媽見盡虎媽怪行 劉曉彤(上):記住兒女唔係Trophy!

性格大癲大肺、拍戲上遊戲節目全無形象可言,那些年的女笑匠劉曉彤勢估唔到一結婚生仔後,就徹底告別幕前相夫教子成為全職媽媽。家有一子兩女,劉曉彤話成為媽媽輩打入人母社交圈後,最睇唔慣就係虎媽們對兒女谷到盡,然後沾沾自喜在社交網絡曬仔成狂:「每個人都係獨立個體,生兒育女望佢哋好但係永遠要記住佢哋唔係父母嘅 Trophy (獎杯),與其帶個仔出去介紹俾人聽『嗱,佢考試一百分十項全能架!』我寧願教到個仔大方有禮貌性格出眾,靠自己交到朋友融入群體!」

少男少女難湊過BB
04 年結婚、06 年產子,劉曉彤話同另一半一樣渴望大家庭,本來計劃生夠四個,奈何年紀唔細時間有限,四年抱三就要收工。育有一個兒子和兩個女兒,分別 12、11 和 8 歲,年紀近小時候固然忙到甩碌,入學和步入青春期以後,其實更讓媽媽費盡心神:「回想番 BB 時期,只係要餵飽佢哋,知道佢哋瞓得痾得,簡單得多。依家至係真正打仗一樣,讀書返學啦、情緒變化啦、駁嘴駁舌啦,仲有踏入青春期生暗瘡身體變化又要教佢哋保護自己尊重別人,真係好多好多學問。呢個年紀佢哋覺得自己識好多嘢,自以為係小大人,好多道理聽唔入耳、或者扮聽其實繼續自己嗰套,作為家長可以做嘅,就係俾啲耐性再俾啲耐性,既要有威嚴又要做朋友,希望由細開始唔好嚇走佢哋,到長大仲會同我傾偈、有嘢仲會同我share。」

 

image3
態度開放少點禁忌
幕前癲喪性格率直,退居幕後做起全職媽媽,劉曉彤話最緊要能屈能伸、搞得笑亦要能正經,應有禮貌、要守規矩時就要絕對企硬:「作為家長,我大部份時間都好傳統,要有尊卑、要對長輩恭敬、哥哥要愛護妹妹、品行禮儀應教應做都一定要做足。不過我都有好嘈好玩得一面,亦會做個好朋友,有時聽家姐仔分享吓啲少女心事,講真我都後生過少女過,大把嘢分享,不過媽咪啲曳嘢就梗係唔好呢個年紀話俾佢哋聽嚇親佢哋啦!大嗰兩個仔女步入青春期,好多嘢教好多嘢問,好多時我唔會喝佢哋,而係慢慢解釋俾佢哋聽。比如話講粗口係助語詞,你成日講又點會有高低起伏、又點會起到作用呢?又比如話小學生鍾意攞人體器官嚟講笑,性呢方面話題我就唔會小事化大、大驚小怪,相反係輕描淡寫一啲,趁機又教曉佢哋 Love is love、性行為性取向都係再自然不過的事,但係唔可以攞嚟講笑,既要睇場合有分寸,亦都係對自己同別人的尊重。」

 

image1

預告:婚後退出幕前成為全職媽媽,劉曉彤話最怕別人話佢係幸福少奶奶唔憂做:「老公加埋三個細路,家頭細務食飯穿衣頭暈身㷫有邊樣嘢唔關媽媽事?」

 

想知更多育兒資訊 請留意Easy Pama

想隨時獲得更多親子資訊,就快啲like我哋Facebook啦!⁠⁠⁠⁠
推介內容
event_latest