教養之道
兩年抱倆六月生得 黃婉曼(上):有能力仲想生多幾個!

從天氣小花到節目主持,從專欄作家到麵包學校老闆娘,黃婉曼同時也是快樂人妻和人母,17年誕下女兒Kyra榮升人母,去年公布懷有第二胎,六月就是預產期!歲半的Krya就快做家姐,Icy話女兒天性溫柔又大方,一點不擔心Krya會妒忌妹妹:「我今年都34歲,有時間又有經濟能力的話,都仲想生多幾個。因為爸爸媽媽始終唔會永遠喺佢哋身邊,我希望未來佢哋兄弟姊妹可以互相扶持同倚靠!」

IMG_3282

來之不易健康就好
黃婉曼開心公布,第二胎都係女嚟㗎!從小思想傳統,再加上「她」來自潮洲,做媽媽以前,Icy也說本以為要生個兒子才夠圓滿,將來才有兒子能靠,不過九月懷胎加上這年半初為人母的體驗,本來的觀念完全顛覆:「以前覺得老公有個前世情人,我都想生番個前世情人俾自己,個仔大個擔得抬得,有個猛男照顧我都好嘛!不過有咗Krya就發現,其實生女好嗲好乖好窩心,成日錫勻全家又錫埋我肚裡面個妹妹,真係全家嘅甜心嚟!同埋我性格都鍾意靜,真係做過至知,原來同女睇吓書,傾吓偈,唔使周圍跑跑跳跳體力透支,生女可能更啱我喎!仲有一樣嘢我覺得最緊要,試過九月懷胎每個媽媽最清楚不過,由知道懷孕,到孕期不停嘔經歷各種唔舒服,keep住產檢check住心跳,4個月去驗唐氏,跟住又照結構照內臟,大大小小經歷十幾次產檢同檢測過咗咁多關,我同呢個BB經歷過咁多,就知道每個生命都來之不易,真正祈求嘅會變得好簡單,男仔女仔真係變得唔重要,最緊要都係健康!」

IMG_3319

箇中苦樂試過才懂
第一次懷孕日嘔夜嘔小心翼翼,這一次Icy說不論心情還是身體狀況都舒服得多:「第一胎始終係會緊張啲,醫生講啲咩我樣樣做齊,唔敢搭飛機,唔會食海鮮搭飛機,染頭髮、飲咖啡、油指甲一概掂都唔敢掂。今次就隨意咗好多,識得感受自己身體,知道有咩自己受到,都plan緊去東南亞出個短trip,帶埋Krya跳出香港玩幾日。成日聽人講做媽媽有幾難有幾辛苦,講真,有啲嘢你真係要親身經歷過至有體會。Krya啱啱出世時唔飲奶又冇便便,要留院觀察個幾星期,初為人母又受荷爾蒙影響,我真係大受打擊好有挫敗感,成日覺得係自己陀得唔好、做得唔夠。見到人哋開開心心同BB出院,真係喊到崩潰。到佢跟我返屋企,想俾最好嘅人奶佢,又唔捨得經人哋手,每日自己湊自己埋身餵,奶水唔夠試勻所有方法每次用盡全力最後一滴都唔敢浪費,所有嘢都係挑戰,都係鍛練毅力。呢個時候,你就真係知道,呢個世界真係冇一種愛比母愛更深厚,因為我湊女嘅同時,幫我最多、最勞心勞力嘅,咪又係我媽咪囉!」

IMG_3321

預告:二女兒出世有排忙,大女兒又係時候要搵學校計劃升學。黃婉曼說,孩子的教育方針和理念,原來不能只靠一個人努力,得要全家都一致!

 

想知更多育兒資訊 請留意Easy Pama

想隨時獲得更多親子資訊,就快啲like我哋Facebook啦!⁠⁠⁠⁠
推介內容
event_latest