教養之道
做過艷星拍過寫真 林雅詩(上):做媽媽後才知道後悔!

選過港姐、簽過王晶做「晶女郎」、拍過三級片亦出過寫真,林雅詩05年結婚產子退出幕前,可惜和另一半無法白頭偕老,三年多前離婚又復出。如今兒子Nicholas已經13歲,資訊發達媽媽的過去想瞞也瞞不了,40歲的林雅詩說年輕時候的選擇逼不得已,不過做了媽媽以後才悔不當初,趁機也可以教育兒子:「每個決定都影響深遠,行每一步真係要諗清諗楚!」

對兒子瞞也瞞不了
離婚後兒子Nicholas跟著媽媽一起住,林雅詩一邊賺錢養家,一邊也要對剛步入青春期的兒子特別留心保持溝通,可幸Nicholas乖巧也明白事理,並沒有想像中反叛期的難纏:「個仔好乖又內向,有咩都會同我講,學校有女仔主動追求佢,都會問我應該點應對。因為Nicholas讀國際學校,鬼妹鬼仔玩得埋又Open,我會提醒佢玩還玩一定要尊重女仔、小心身體接觸。呢個時候都要適當進行性教育,好彩我Uncle係醫生,交俾專業人事同佢傾,佢都知道成件事好自然,一啲都唔覺得尷尬。個仔開始大、依家資訊發達想知乜嘢google就得,阿仔search我個名都會見到以前好多性感劇照……講真,後生時好勇、機會擺喺面前就想抓實,但係做咗媽媽之後會覺得後悔。呢件事我都有同阿仔認真傾,話俾佢知每個人都有過去、都可能做過錯誤決定,所以行每一步都要諗得更長遠,一定要知道自己可以承受結果!」

從傳統到國際學校
總是希望兒子未來的路能比自己更多選擇、走得更遠,所以林雅詩當初也以為學齊各國語言琴棋書畫入讀傳統名校就是唯一出路:「啱啱做媽媽時的確好容易俾人影響,見到人地小朋友學呢樣學嗰樣、人仔細細好多證書,就覺得自己唔報會好蝕底,所以早幾年我都係怪獸家長嚟,小學又如願以償入到傳統名校。不過Nicholas英文幾好,但中文就跟唔上,形成惡性循環,成績越差越冇自信越抗拒中文。傳統學校又多功課project同測驗考試,根本唔止係佢,我都要做埋一份無得抖。三年班我把心一横幫佢轉去讀國際學校,真係成個學習環境同氣氛都唔同咗。佢中文反而變咗全班最好,越學越有興趣,其他科亦都自己搞得掂,唔使我操心。其實國際學校最好一套係訓練到佢哋獨立思考,嚟緊佢就快要揀科,好知道自己想要乜嘢,又會搵我同Uncle傾吓攞多啲意見,我覺得咁樣至係最健康的成長同學習方式。

預告:離婚就要反目成仇老死不相往來?原來又未必!林雅詩話與前夫離婚以後反而為了兒子相處得更自在,二人都因此變得更成熟和理性。

WhatsApp-Image-2019-01-23-at-15.29.09

WhatsApp-Image-2019-01-23-at-15.29.32

WhatsApp-Image-2019-01-23-at-15.30.00

 

想知更多育兒資訊 請留意Easy Pama

想隨時獲得更多親子資訊,就快啲like我哋Facebook啦!⁠⁠⁠⁠
推介內容
event_latest