教養之道
六個星期新手媽媽 董敏莉(上):要親自經歷每個成長點滴!

16年與圈外律師男友莊耀金結婚,董敏莉婚後與另一半立即開行turbo造人,去年中公布造人成功,11月26日就喜氣洋洋迎來了女兒莊子子(Martha)。Monie說寶貝女兒和媽媽特別有緣,不但生日是同一天,連出生磅數也一模一樣是7.2磅。說到女兒的名字莊子子,Monie說早在懷孕出起已經和老公想好:「老公姓莊,子子呢個名男女都啱用,就係希望佢第時大個同莊子一樣,既有學問,品行又佳!」

失落與美滿之間
懷胎十月,終於等到和女兒見面,Monie和每個媽媽都一樣,看到女兒第一眼、抱在懷裡第一次,心情激動至今難忘:「我雖然係麻醉開刀,不過個人就仲清醒,姑娘第一下抱佢俾我,我見到佢面上有油脂,仲戰戰兢兢問姑娘,唔知係唔係真係掂得。到姑娘話冇問題,我抱佢上手、手指掂到佢第一下,嘩,簡直好似細個追星第一次見到或者掂到偶像,個人好似觸電一樣,激動到不得了。話晒住喺我肚裡面九個幾月,佢嚟到呢個世界當然係最美滿幸福嘅事,但係我都有啲失落。因為懷孕時發現子宮肌瘤,家去醫生度檢查,冇咗個女住喺我度,就淨番個體積仲大過子宮嘅肌瘤……你話做咗媽媽心態最大改變,都係想為咗個女照顧好自己身體。所以聽醫生意見,最快半年後就會動手術,雖然到時焗住停餵人奶,不過一定要顧掂自己先至可以湊好個女,再計劃係唔係追多胎。」

image1-(4)

image2-(4)

每天都有小確幸
港媽個個老奉矜貴,一生B例牌請外傭再加個24小時on call陪月服侍左右三個月,Monie就希望樣樣親力親為,坐月湊B家頭細務,每個星期只有限度聘請鐘點上門輔助:「小朋友咁快大,每一日都有改變都有成長,我真係唔想為咗去多陣街、瞓多陣覺,就將呢啲一生人只會有一次嘅經歷拱手相讓俾人哋代勞。不過的確係辛苦嘅,六個星期以嚟最長一覺都唔夠四個鐘,有時經驗不足又心軟,見個女嘔奶痾屁鼻塞,就心痛到好想幫佢捱。不過邊做邊學,慢慢摸到佢個性,掌握到佢時間表,都覺得好開心又有成功感。早排阿女鼻塞塞,聽到佢個鼻唔通氣飲奶成日濁親就心痛,跟住我買咗個電動吸鼻器,俾我成功吸到一大pet鼻屎出嚟,跟住聽到佢呼吸順暢晒,飲奶又舒服,嘩,真係冇嘢幸福得過呢一下!」

預告:六個星期來湊B日日都有蝦碌嘢,噴奶漏屎樣樣試過。Monie說好在兩公婆都天性樂觀,別人覺得挫折,兩人卻都認為跨過了就變笑料一單,希望女兒長大也能繼承父母這一套,高山低谷,都學會用笑容和正能量面對。

image3-(4)

image4-(4)

 

想知更多育兒資訊 請留意Easy Pama

想隨時獲得更多親子資訊,就快啲like我哋Facebook啦!⁠⁠⁠⁠
推介內容
event_latest