教養之道
想做兒女榜樣 徐榮(上):為人父後成就更好自己!

44歲的徐榮演藝事業慢慢捱出頭來,家有賢妻還有一對寶貝兒女,快滿12歲的兒子Karson是港隊U12足球小將,萌爆的3歲女兒包包則是未夠一歲已經在《愛.回家》亮相,一早累積粉絲無數,家庭也是樂也融融成為最強後盾。一早成家立室,徐榮說人變得更穩重更專注,尤其是做了爸爸以後,對自己要求更高,總是希望做得更好:「教育唔係得把口,教仔女嘅同時,佢哋亦都係我嘅動力,令我做得最好,希望成為佢哋成長嘅榜樣!」

捱更抵夜完陪仔練波
正所謂有其父必有其子,從小看足球愛足球,放學總愛流連球場幾個鐘、踢到身水身汗才回家,徐榮雖然不是刻意讓兒子Karson父夢子還,倒是Karson從小耳渲目染跟著爸爸愛上足球,順理成章上足球班、接受專業訓練,也真的踢出名堂,現在是傑志足球學校和港隊的U12足球小將:「佢一個星期起碼練五日波,每日兩個鐘,有時要比賽、集訓,我唔使開工都盡量車出車入送佢練波、睇佢比賽。呢個年紀精力旺盛唔怕辛苦,又係自己興趣踢得開心,不過小朋友總愛玩愛打機,有時總會偷懶總有惰性,呢個時候爸爸嘅功能就係要督促佢,要佢知道想唔被淘汰想達成夢想,就要放低手上嘅玩樂,就要繼續堅持。除咗球隊操練,我一有時間都帶佢落場練波,計時練速度,又會跑吓斜路練吓啲爆炸力。唔係得佢跑,次次我都落場跑埋一份同佢一齊練。做咗爸爸之後,我真係仲fit過結婚之前,一嚟唔覺得年過四十身材走樣係應份,二嚟都唔希望叫佢打少陣機,自己就唔捨得放低個電話,我都想做好自己,成為仔女成長榜樣。」

image1

image2

image3

足球場上學做人道理
電視台工作再起早貪黑再辛苦,寧願少睡一會還是會陪著Karson練球比賽,除了盡量爭取更多專屬的父子時光外,徐榮說球場上的點點滴滴也是和兒子講道理、把爸爸為人處事的一套滲給兒子的好時機:「小朋友總係單純啲,踢波最大志願就係踢英超、有朝一日代表港隊踢世界盃。小時候我鼓勵多,但係隨住佢長大,就會同佢分析客觀現實,希望佢知道足球發展受到人文地理同環境因素限制,香港足球進步空間仲好大;不過難,唔代表冇可能,最緊要都係要練!佢鍾意美斯同尼瑪,見到人哋攞金球獎、行出嚟前呼後擁當然風光,我會同佢講呢啲球星背後下咗幾多功夫、捱過幾多你又知唔知?即使能力足夠,人事運氣又係另一個因素,正如曼聯粒粒皆星,但個領隊唔識用人吓吓叫你坐冷板凳咪又係不停輸波囉。有時佢喺球隊出聲,我會同佢檢討,就算用意係好,但係時機錯、當眾講,未必會得到效果,亦都會傷害隊員感情,言行真係要三思……其實希望佢學習之餘,我幾十歲人待人處事都未必做得最好,有時講咗出聲都會後悔、都覺得可以處理得更好。我覺得做父母就係咁,佢哋成長之餘,我哋都一直檢討,都係一種學習。」

image4

image5

image6

預告:對著兒子是嚴父,對著可愛爆錶的包包呢?徐榮一提起寶貝女兒就說投晒降,原來前世情人一碌大隻眼出嗲招,呢個嚴父都無晒符!

 

想知更多育兒資訊 請留意Easy Pama

想隨時獲得更多親子資訊,就快啲like我哋Facebook啦!⁠⁠⁠⁠
推介內容
event_latest