教養之道
一個月人仔照樣要鬧 吳日言(下):做媽媽最考驗耐性!

從新婚夫妻升格成為新手父母雖然可喜可賀被幸福環繞,不過每隔兩小時埋身餵奶、一手一腳親力親為自己湊女還要照顧頭家和老公,每天手忙腳亂又冇覺好瞓才真正媽媽的考驗。女兒剛剛滿月,說教育雖然還言之過早,吳日言則說早有心理準備,知道做媽媽其實是和女兒一起學習、一起成長。

image2

湊女同時鍛鍊自己

女兒Beatrice剛滿月,Yan說這個月以來兩公婆邊做邊學,不知不覺和女兒都在成長:「生前生後真係會改變好多,老公怕污糟,以前成日話手一定會幫,不過換片就咪搞佢,結果個女出世後邊分得咁清,需要時一樣出手,都唔知已經換咗幾多條片。多謝老公,喺呢個月幫咗好多手,不過Bea出世,咁啱老公同我新舖開張,佢每日朝六晚九忙完十幾個鐘,我都學識體諒,自己冇得瞓,但都唔忍心老公冇時間休息。至於我自己,隔兩個鐘餵一次奶,對上一次有得滿足瞓番一覺已經唔記得係幾時……有時阿女扭計喊,我都冇耐性,唔理佢聽唔聽得明,照鬧!哈哈……呢個時候媽媽固然要發洩,我都覺得BB就算係細,都要教、都識聽語氣。不過講番轉頭,做咗父母就會更識檢討自己缺點、希望有朝一日可以喺仔女面前做個好榜樣,一路湊女、我一路都睇到自己咁多年性急又冇耐性,希望同個女一齊成長一齊進步。」

image3

image4

跌跌踫踫才會成長

和不少新手父母一樣,孩子還沒出世,身邊就已經有虎爸虎媽危言聳聽叫吳日言報定名、排定名校。阿Yan倒是企得硬,覺得時代不一樣,學習成績和品德成就不能掛勾:「我真係冇其他人咁癲,未出世就攞表格去報名牌幼稚園。睇咗眼前先,戒夜奶先係當務之急啦,係唔係呀?上一代嘅嘢,擺喺今時今日真係過咗時,首先我唔希望擺父母款,想同個女做朋友,希望佢第時有咩都願意同我分享搵我分擔。我讀書都唔叻,但我更清楚出嚟做嘢,到底有幾何會用得著書本上嘅知識呢?我希望我嘅女第時可以發揮自己所長,最緊要係識談吐、識待人處事,同埋識得踩完地雷仲可以企番起身學到嘢。做父母唔係要打造一條康莊大道俾子女,而係要俾佢哋跌跌踫踫,唔錯過要點會成長呢?」

image5

 

想知更多育兒資訊 請留意Easy Pama

想隨時獲得更多親子資訊,就快啲like我哋Facebook啦!⁠⁠⁠⁠
推介內容
event_latest