教養之道
【星Easy】效力三十年 為兩個女離巢 郭政鴻(上):唔想無心無力應酬個女!

接受訪問這一天,郭政鴻先煮好兩個女兒Kaley和Ashley的午餐飯盒,親自送到學校,再跑一轉街市買餸。他說雖然家有外傭幫忙,女兒們三餐還是更喜歡吃爸爸的味道。天氣轉涼又乾燥,這一天郭政鴻買好材料,打算焯個海蝦、炒一味孩子最愛的草菰青瓜,再煲一味海底椰雪梨湯潤一潤:「我鍾意湊女又鍾意煮兩味,呢啲嘢以前喺電視台做嘢諗都唔敢諗……捱更抵夜拍劇,返到屋企兩個女唔係瞓咗就返緊學;難得喺屋企撞到,我都係精力透支,根本冇晒電應付佢哋,真係唔想以後日子都係咁過,唔想錯過咗太多!」

image5

為人父以後 世界從此不一樣
一出道就效力電視台,一轉眼就是三十年。15年,郭政鴻把心一橫離巢向外發展,除了天時地利人和,最大的原因還是為了兩個女兒:「大女Kaley下個月就9歲,細女Ashley今年7歲,一個四年班,一個讀緊二年班。我諗有咗家庭、做咗爸爸,對我改變最徹頭徹尾。事業總有高高低低,呢行總少不免會遇著啲負面新聞,以前睇得好重嘅嘢,到做咗爸爸以後,乜嘢都唔再重要。你哋講咩都好,已經冇辦法影響我,因為對我嚟講,一家人齊齊整整開開心心至係我真正嘅追求。成日聽到啲婚禮,嫁女嘅爸爸反應最大、喊得最淒涼,我諗我開始明點解。當然喺女兒長大過程中,生活學習細節媽媽付出更多,出邊再苦再難、遇到幾大挫折都好,係咩支撐一個爸爸行落去、永遠唔會帶負面情緒回家,咪就係兩個女囉!」

image3

image4
點對點管接送 父女專屬時光
結束電視台永無天日拍劇生涯後,郭政鴻入行以來首次成為自由身藝人,接拍電影電視劇、北上出席商演活動,收入增加工時則大大減少,可以補回來早兩年錯失了不少的父女時光:「功課同課外活動主要都係老婆去跟,我就負責車出車入、陪玩、同埋做大廚。小學午餐有得訂飯,不過口味寡,小朋友都嫌悶。所以隔個月都會變咗我煮埋又送埋飯,兩個女好鍾意食我煮啲嘢,次次見到佢哋掃清光,滿足感爆燈!每個星期有兩三日車佢哋去課外活動,或者星期六朝早,想俾媽咪抖番日、瞓多陣,就由我帶佢哋出街食早餐。呢啲車程、撐枱腳啦,自然成為我哋專屬父女時光,有時傾吓學校發生啲咩事、有時俾佢哋兩個嗲吓、餵我食啖早餐,嘩……成個人冧晒。講起上嚟都眼紅紅,媽咪可能再緊張啲、照顧再貼身啲,爸爸唔識表達,但永遠都會離遠吊住你兩個尾、睇住你哋一舉一動,係永遠在背後保護你哋嗰個人!」

image2

預告:兩個女兒都在九龍塘傳統名校就讀,功課壓力都不少。郭政鴻很堅持一個宗旨,希望女兒們記住在學校同時學的是生存智慧,至於學習成績,盡力就好!

 

想知更多育兒資訊 請留意Easy Pama

想隨時獲得更多親子資訊,就快啲like我哋Facebook啦!⁠⁠⁠⁠
推介內容
event_latest