教養之道
林盛斌Bob(下):拒事事幫仔女解決 父母係後盾唔係衝鋒隊!

家有四個兒女,Bob說和太太都盡量做到不會厚此薄彼,讓每個孩子都能感受到父母的愛和關注,明白到多添一個家庭成員,就是多了一個兄弟姐妹分擔,還有一同成長:「大家姐學校成績、待人接物樣樣都強,見到二家姐有時會覺得受冷落、被比下去,我同老婆都會陪佢傾吓,更多留意佢感受;細佬出世,本來最細最多關注嘅三家姐出現行為反差,我哋都會更加小心,唔想佢哋任何一個覺得父母嘅時間同愛會被細佬霸佔。父母嘅愛係無限、我想話畀佢哋知,我同老婆係佢哋最強後盾,呢樣嘢永遠都唔會變。」

image2

image3

image4

EQ高四兩撥千斤 身教最重要
前文說到開心share學行片段都會被網友批評重男輕女,事實上不止這樣,名氣越大、工作越多,阿Bob遇到的負評也變多。最難得的是,阿Bob不會被負評牽動情緒,總會親自回覆網友,EQ高到加零一:「我當然知道冇可能取悅所有人,咁做其一係想話畀佢哋知,各方面嘅意見我真係睇到,合理嘅我都會解釋同改進;其二,我嘅工作就係娛樂大眾,偏激嘅網民始終係少數,花小小時間唔啱講到啱、(o氹)返佢哋由嬲嬲變笑咗,哪怕十秒八秒,由負能量變正能量,我覺得做到,點解唔去做?我諗呢一種態度對仔女都係一種身教,見到爸爸好少發火,聽到爸爸成日教佢哋學識欣賞人,講真嗰句,我見到三個女都學到嘢,好少爭嘢好少嗌交,有時開口,都係諗到同講到一啲好聽嘅說話。唔係叫佢哋虛偽同好假咁做人,而係世界咁大,學識去睇好嘅一面,學識去講正面說話,無論對自己、對別人,都有好處。」

image5

image6

image7

路要自己走 父母不是衝鋒隊
電台電視台、拍戲主持、開埋製作公司又做埋經理人,密密賺就是為了「成功靠父幹」、為兒女打造富貴無憂成長環境?非也非也,阿Bob說打拼事業努力工作,是男人應該負起的責任和使命,兒女未來的路還是要靠自己走:「大女霏霏學咗年幾劍擊,最近話唔想再學。為人父母,我哋首先係了解咗原因先,原來由花劍變重劍,玩法唔同又對住啲大哥哥大姐姐,佢覺得唔慣又開始失去興趣;當然都會勸佢再嘗試再堅持,試多幾堂都係想放棄,唔緊要,我同霏霏講,你嘅決定我哋支持,但係後果要你自己面對,你自己去同教練講。我想話,人生流流長,阻礙、困難,一定有,唔緊要喎,你哋挺身去解決,爸爸媽媽永遠喺度,會陪伴你哋面對。父母應該係最強後盾,而唔係衝鋒隊,條路上面嘅阻礙,應該係佢哋自己見到、自己去鏟除,唔知點做、唔夠力搬,爸爸媽媽畀意見你、幫你一把,無問題!但係見到條路有石有斷樹,父母衝去前邊清晒啲垃圾同障礙物,鋪條好靚好平坦嘅路,再叫啲細路行……唔係囉!咁樣啲細路長大,唔會識面對問題,跌一交,會永遠都唔識爬返起身!」

 

📣相關閱讀
▸【星Easy】林盛斌Bob(上):由朝做到晚 為搵食錯過咗仔女成長!http://bit.ly/2OOoJ8x
▸【星Easy】劉小慧(上):大女志願做甜品師 搵到自己條路鄧佢開心!http://bit.ly/2OOPLNc
▸【星Easy】劉小慧(下):細女讀名校爆喊 響呢個警號決定轉校!http://bit.ly/2OTKAeX
▸【星Easy】岑潔儀(上):湊一個陀一個 為兩個仔讀兒童心理學 http://bit.ly/2OTg70E
▸【星Easy】岑潔儀(下):唔學奶奶做虎媽 拒讓仔仔讀兩間幼稚園 http://bit.ly/2ORtX3u

想知更多育兒資訊 請留意Easy Pama

想隨時獲得更多親子資訊,就快啲like我哋Facebook啦!⁠⁠⁠⁠
推介內容
event_latest