教養之道
林盛斌Bob(上):由朝做到晚 為搵食錯過咗仔女成長!

剛過去的中秋節,是林盛斌Bob的39歳生日。朋友多、瓣數多,Bob說年輕的時候一定呼朋喚友飲天光,如今家有三女一子、又剛剛通完波仔大病初癒,最幸福的事就是齊齊整整被老婆仔女包圍,在家靜靜雞切返個蛋糕仔。結婚十一年生了四個,產量冠絕娛樂圈,肩膀上的負擔也是可想而知的沉重。要發展事業,也要養家糊口,Bob證明了再忙也總是能抽到時間陪陪老婆和兒女:「生仔女出嚟就係想佢哋健康快樂成長,冇爸爸嘅陪伴,佢哋又點會健康快樂成長呢?」

拖男帶女的爸爸 型到上太空
迎月這一天,太太Pearl帶著三個女兒參加手作月餅班,Bob前一天晚上才從澳門工作回港折騰到凌晨四點,第二天早上寧願睡少些也要陪陪小兒子玩,然後下午邊陪女兒邊做訪問,到了晚上再開工做司儀:「爸爸辛苦佢哋都知,仔女好多好多個第一次我都唔喺身邊,大女開學禮、畢業禮、第一次做主持;二女第一次學懂識游水;三女第一次叫爸爸;細仔第一次由張床爬落地下,再企起身行,呢啲第一次嘅時刻,我全部都睇唔到……我係嗰啲一得閒就鍾意攞個電話出嚟睇吓仔女啲相、聽吓啲女嘅留言嘅人,喺出邊打拼、做得辛苦時,成日提醒自己,努力係為咗佢哋、屋企仲有佢哋等緊我返嚟。 啲女知爸爸去咗開工、老婆都從來唔會怨我永遠缺席重要時刻,但係我唔會畀自己用忙、用辛苦做藉口。朝早寧願瞓少陣,帶佢哋去睇個早場動畫,睇完戲就係專屬父女時光,食吓啲junk food、一人一個波板糖。我想話,最型嘅唔係瞓多一陣覺、唔係朋友多又食又飲,係抱住一件、又拖住另外三件好似三個女朋友仔一樣行出街,幾威!幾型!嗱……呢幾個全部都係我出品架!」

image2

image1

image3

 

三千金加與迷你Bob 都是心頭肉
一生就四件,其實Bob嫂Pearl一早也澄清過,絕對不是為追仔,也絕對沒有來自老公的壓力;早前Bob開心share兒子Jaye學行、女兒們開心鼓掌短片上網,無奈又遇到網友抽秤:「噢!仔識行就開心,啲女學行又唔見你咁興奮!」Bob說起來一臉無奈:「開心分享啫,做咩啫?我幾時話過淨係錫個仔、一定要追個仔啫?再澄清一次,真係冇追仔!雖然我屋企潮州人,不過從來冇重男輕女嗰一套,仔女都一樣咁養一樣咁教。不過真心嗰句,做得婚禮司儀多,我好容易代入幻想自己坐喺台下、台上致詞多謝爸爸嗰個係大女霏霏、二女熹熹,有時又會諗多咗:第時啲女嘅花車嚟到,樓下夠唔夠車位擺呢?個廳夠唔夠大,畀班朋友玩遊戲接新娘呢?諗諗吓,又起晒雞皮有啲眼紅紅。有時同外父食飯,見到老婆同佢家姐都嫁得幾好有個錫佢嘅老公,我想話,我對啲女期望都係咁簡單,開開心心、有個好歸宿就夠喇。你諗吓,第時我屋企做節,個個仔女帶埋老婆仔女嚟同我食飯,要開兩圍至夠坐,幾熱鬧?」

image6

image5

image4

預告:不講道理、逢Bob必反的網民,Bob遇過不少。難得的是,再忙再負面,還是會盡量親自回應、唔啱講到啱,笑笑口(o氹)到網友開心返。阿Bob說,不是希望全香港觀眾都喜歡自己,這樣做既是一種做態度,也是一種身教。

📣相關閱讀
▸【星Easy】劉小慧(上):大女志願做甜品師 搵到自己條路鄧佢開心!http://bit.ly/2MKa5xy
▸【星Easy】劉小慧(下):細女讀名校爆喊 響呢個警號決定轉校!http://bit.ly/2plnFOm
▸【星Easy】岑潔儀(上):湊一個陀一個 為兩個仔讀兒童心理學 http://bit.ly/2xaJOm2
▸【星Easy】岑潔儀(下):唔學奶奶做虎媽 拒讓仔仔讀兩間幼稚園 http://bit.ly/2xay2YT

 

想知更多育兒資訊 請留意Easy Pama

想隨時獲得更多親子資訊,就快啲like我哋Facebook啦!⁠⁠⁠⁠
推介內容
event_latest