教養之道
何嘉莉(上):我都曾經係緊張大師!

昔日的英皇小花何嘉莉,如今已經是兩個孩子的媽媽,大兒子Jean快滿六歲,而女兒Zoe下個月就滿一歲。相隔五年再做媽媽,何嘉莉說當年誕下頭一胎驚青、緊張、小心翼翼的回憶番晒嚟:「想當年我都係緊張大師一名,好似其他媽咪一樣第一胎乜都唔識、人哋講乜都會信,由沖涼餵奶到轉固逐樣測試敏感食物,所有嘢跟書本跟到足仲覺得自己做得唔夠好。相比之下,第二胎梗係淡定粗養得多!」

1
女女食得瞓得 仔仔至係重心!
孻女孻心肝,就梗嘅!不過11個月大的Zoe可愛又易湊,媽媽何嘉莉自然也就放得下心,把心神更多都投入在剛讀小學的哥哥身上:「好彩妹妹食得屙得好易搞,呢個階段我更注重哥哥升小學適唔適應。佢前排至喺學校同朋友玩到過火,搞到被人打到鼻都爆缸……呢個仔好斯文又容易相處,去年升國際學校grade 1,梗係最想交到多啲朋友。做人媽媽就係咁矛盾,怕佢太書蟲太孤獨,又怕佢交朋友太投入冇咗底線,所以一方面要同佢講玩要小心安全、珍惜朋友唔代表要不顧一切,另一方面又會話佢知男子漢要識保護自己亦都要堅強,媽咪細個時都曳過、叉錯腳落渠搞到隻腳冇咗成忽肉,出咗事又怕被婆婆鬧,一滴眼淚都冇流,返屋企嗱嗱聲用花灑沖走啲血先。由生佢落嚟,到佢依家就快六歲開始有自己生活,成日好好奇爸爸媽媽童年點過、撩我哋傾偈問東問西,呢種溝通同樂趣,又同湊BB完全唔同。」
2

3
第一胎係白老鼠 做妹妹最幸福?
話說小朋友是一張白紙,其實新手媽媽第一次也一樣甚麼都不懂。雖說和哥哥Jean更多回憶情感更有層次,何嘉莉也說其實六年來為人母自己也是一邊學習一邊成長,為了成就現在的自己,大仔也做了好幾年白老鼠:「咁以前真係乜都唔識、好多資訊都係聽人講、睇書學番嚟。最基本講食物,以前我真係好聽話好驚青,轉固時期人哋話要試會唔會敏感,一次只能試一種、一試就試四五日,我都做到足……即是話哥哥半歲大開始,成日畀我逼佢食菜汁,三五日西蘭花汁、三五日紅蘿蔔汁,好彩佢又一舊飯咁,唔識反抗又唔識投訴,諗起就陰公。依家妹妹當然幸福得多,有咗第一胎經驗,我都明白書本有道理,都要因應自己情況學識變通。依家妹妹啲糊仔,有薯仔、蕃薯打蓉做底,加啲肉碎再打啲唔同色蔬菜落去,咁至有營養又好味得多!」

4

5
預告:孩子長大了,媽媽才明白,生兒育女當然不止食得瞓得便便暢通咁簡單,所以何嘉莉談自己一套育兒經,九成九都圍繞著6歲的兒子Jean。

📣相關閱讀
▸【星Easy】區永權(上):我辛苦好過全家辛苦!http://bit.ly/2OZBGwf
▸【星Easy】區永權(下):爸爸要求好簡單!http://bit.ly/2By316U

想知更多育兒資訊 請留意Easy Pama

想隨時獲得更多親子資訊,就快啲like我哋Facebook啦!⁠⁠⁠⁠
推介內容
event_latest