教養之道
區永權(上):我辛苦好過全家辛苦!

區永權(Albert)2009年和設計師女友Clara結婚,婚後兩年抱兩、生下長子Aidan和幼子Ambrose。兩兄弟年紀只差一年、高度相近、樣貌相似,行出街人人以為係孖仔;一起玩一起長大,又互相影響興趣愛好也一致,自然而然,不止是兄弟,也是最好的朋友。7歲的Aidan現在是國際學校Grade2小學生、六歲的弟弟Ambrose今年也將入學與哥哥做同學,國際學校學費打孖上,Albert膊頭的負擔有幾重,你懂的:「最緊要佢哋讀得開心冇壓力,爸爸辛苦,好過全家一齊辛苦!」

辛苦跑數 等爸爸一個人頂!
一直嚮往家庭生活、婚後如願做了兩兄弟的爸爸,婚前愛見朋友愛打機,婚後一概戒得乾淨,有時間都用來接job跑數忙湊仔,區永權說這些不叫犧牲,叫投入家庭:「小朋友仲細時,我都仲會撩朋友上網打機,陪我等餵夜奶,慢慢到佢哋大,機都唔打,寧願陪吓兩兄弟玩;唔可以叫做犧牲,根本有咗頭家、做咗老竇,收工我都心急返屋企見Aidan同Ambrose,以前社交活動自然慢慢fade out;開始做爸爸時我就同自己講,我係傳統學校長大,傳統學校好處同壞處自己心裏最明白,如果只係學校學費貴,做爸爸咪辛苦小小囉,勤力些跑數去跑啲學費番嚟;但係如果讀傳統學校,就係要做功課跟進度溫默書考試承受埋壓力全家一齊辛苦,呢條數好易計,見到佢哋讀得開心冇壓力,就知辛苦啲都值得。」

image1

image2

image3

競爭激烈 不是孩子的錯!
當初Aidan和Ambrose兩兄弟入學考幼稚園和小學,區永權說自己也試過怕孩子競爭力不夠,曾經迷失過:「見到人哋小朋友揹住六、七個興趣班,我都有啲怕,都試過兩三歲報數學班、四歲未到去學琴。結果見佢兩歲讀1至100、四歲人仔手指冇力又冇興趣彈琴,就開始意識到現實,小朋友學嘢唔應該係咁、理智啲啦!國際學校之前,都報咗好幾間心儀嘅直資學校。我計過數,2000人選60個、4000人選80個,四十份之一機會,去到邊都係同一批人爭。兩個仔唔太夠爭,成日第一輪已經被out,我都氣餒過,覺得好挫敗。其實打籃球一樣,呢一球失咗分,你唔會坐喺度悼念嗰一球,而係嗱嗱聲搶番個波繼續打,做人都應該明白呢個道理。第時佢哋總會搵到自己特長同熱忱,再加上性格外向、識表逹自己、有禮待人、又有兩文三語表達能力,長大以後,我相信唔需要過份擔心。」

預告:相差一年的Aidan和Ambrose,感情和默契就跟孖生兄弟一樣好,做甚麼都要一起,爸爸區永權說自己小時候被年長四歲的哥哥打大鬧大,特別羨慕如今兒子能有最佳玩伴。

image4

image5

image6

 

📣相關閱讀
▸【星Easy】黃致豪(上):女女話我一啲都唔惡!http://bit.ly/2Mvfut3
▸【星Easy】黃致豪(下):我父母嗰套需要改良!http://bit.ly/2OoV19H

 

想知更多育兒資訊 請留意Easy Pama

想隨時獲得更多親子資訊,就快啲like我哋Facebook啦!⁠⁠⁠⁠
推介內容
event_latest