教養之道
黃致豪(上):女女話我一啲都唔惡!

接受《1+1的情深》訪問,黃致豪(前名黃長興)談起老婆Peggy為自己放棄空手道,內疚到喊;演出劇集《BB來了》,又溫柔瀟洒風度翩翩,連高海寧都電得暈……你以為幕前和對住老婆的黃致豪就叫暖男好深情?那是因為大家還未見識過他對住女兒Paige個冧豬樣!這一天,黃致豪帶著一對分別四歲和兩歲的兒女Paige和Tristan接受EasyPama訪問,口講話要學似自己父母一樣做個嚴父,結果攬實又啜爆寶貝女問:「爸爸惡唔惡?」,囡囡評語最中肯:「一啲都唔惡!」

暖男人夫 更是天生女兒奴
今年39歲的黃致豪,五年前和圈外女友Peggy結婚,婚後不久就成功懷孕,再三年抱倆生下一對兒女Paige和Tristan,「我家庭觀念好重,一直想要個大家庭,以為生兒育女好簡單、一定開心啦!當然係開心,不過原來教育都係一個好大課題,做爸爸呢樣嘢,依家仲係努力學習中。鍚女多過錫仔?哈哈……對住個女同對住個仔,真係有唔同。女女似媽咪,好嗲好鍾意黐我,咁都好正常啫,我自然好少鬧佢、希望保護佢;而仔呢,我覺得應該要硬淨啲,佢似我呀,天生有演藝戲胞,跌親整親首先週圍望吓先,冇人見到就企起身繼續玩,有觀眾呢,即刻扁嘴唧眼淚……戲子嚟(o架)!我就會同佢講,男子漢、堅強啲!你係大隻仔吖嘛,冇事嘅!」

image1

image2

image3

至勇爸爸 仲想生多兩個!
老婆Peggy主內,把一對兒女的學習溫飽、生活日長照顧得無微不至,黃致豪則主外,平時電視台、法國餐廳兩邊忙,於是喜歡早睡早起,一大早就陪著孩子享受家庭樂:「我最enjoy就係每朝早同對仔女一齊煮早餐、食早餐,一齊整pancake、一齊行去九龍城買牛角包。我鍾意大家庭,好想再生多兩個,最好係孖!當年同老婆拍拖,佢話屋企有雙胞胎基因,所以我至會即刻決定要同佢結婚啫嘛……哈哈,講笑!不過呢個話題要遲吓傾,因為太太媽咪上個星期過咗身,婆婆同仔女好親,我哋有宗教信仰,所以話畀Paige同Tritan聽,婆婆係返咗天父身邊,每晚一齊祈禱,都會同婆婆講,我哋會照顧好媽咪、照顧好公公,你放心、喺天父身邊都要開開心心。佢哋始終仲細,Paige覺得婆婆去咗旅行,成日問我婆婆幾時返香港……」

預告:太太在香港土生土長,黃致豪則是四歲就跟著父母移民法國,兩地教育大不同,既然在香港落地生根,黃致豪也就在教育方面都交給老婆話晒事。

 

image4

image5

image6

 

想知更多育兒資訊 請留意Easy Pama

想隨時獲得更多親子資訊,就快啲like我哋Facebook啦!⁠⁠⁠⁠
推介內容
event_latest