教養之道
Tom@Mr. X Leanne(上):做小孩不用太現實

樂隊Mr.鼓手杜志烜(Tom)當年與陽光妹Leanne(何思諺)相戀、生下杜杜(杜卓霖)時還不到24歲。一眨眼,兒子已六歲半、開學就要升小學,爸爸Tom也踏入三字頭。兩年前,Mr.脫離唱片公司獨立發展,登台做騷遠遠不夠養家糊口,Tom就自資開設音樂學校賣結他、教打鼓幫補家用。現實就是這麼殘酷,講夢想、玩音樂能維持生計的成功例子並不多,如果杜杜未來的興趣愛好在社會上難搵食怎麼辦?Tom爸爸的答案好man又有型:「搵食等大人去擔心,小朋友太早思前想後、避重就輕,人生會錯過太多!」

image1

image2

玩音樂難搵食? 唔係仔仔呢個年紀去擔心
22歲隨團出道時,Mr.有校長譚詠麟、陳奕迅提攜,一鳴驚人很是吃香。不過花無百日紅、又加上年紀輕輕做了爸爸,為了支撐頭家和繼續自由自在做音樂,這些年Tom教打鼓、又開店賣樂器,看到爸爸教大哥哥打鼓,本來興趣不大的杜杜也開始眼紅、纏著爸爸學埋一份:「到底玩音樂係唔係搵到食,我諗呢樣嘢唔應該係佢呢個年紀去擔心。我22歲入行時,對呢個世界好有憧憬,係呢一兩年才感受到世界現實,其實都係一件好事,當你未知社會界現實同殘酷時,才會做一些長大以後、老練以後,唔敢去做的事。我覺得人太早感受現實、諗得太多,就會縮。佢總有一日會大,失敗都係一種經歷,如果所有嘢都避重就輕,我怕杜杜人生會錯過很多好的東西。」

image3

image4

似爸爸恨認同? 自信要靠努力建立!
媽媽Leanne說夫妻兩人不喜歡逼孩子學樂器、讀書串生字,不過也從來不會擔心杜杜的讀書成績:「佢對自己要求好高,我唔擔心佢做唔到,反而怕佢太希望得到認同。好似畫幅畫,人哋話唔靚,佢會懷疑埋自己,所以我成日都叫佢問咗自己先:『你自己覺得靚唔靚先?又畫得開唔開心呢?』有時做有啲嘢,自己享受過程抒發情感,係唔係更重要呢?」爸爸Tom則覺得孩子這一點是遺傳自己:「我都係一個好介意別人想法、希望得到認同的人,做呢行,唱首歌,邊個唔想更多人聽到、更多人認同?呢件事可以係好事亦都可以係壞事,我覺得,任何自信都係要靠努力得來,如果想得到別人的認同,首先要付出。如果乜都唔做,空想希望別人欣賞、見到你的好,咁至係等運到!」

image5

image6
預告:六歲半的杜杜觀察能力高、接受能力也強,耳濡目染,也跟爸爸媽媽一樣,就得人又會替人著想。到底太替人著想是不是就代表忽略自己膽小怕事?原來也不盡然。


想知更多育兒資訊 請留意Easy Pama

想隨時獲得更多親子資訊,就快啲like我哋Facebook啦!⁠⁠⁠⁠
推介內容
event_latest