教養之道
張達倫(下):兒子像我就夠了!

為人父,誰不希望兒女成龍成鳳、出人頭地?我問張達倫對兒子碩碩的期望,想不到答案簡單得很:「我希望佢同我一樣就夠喇!因為我佢成長環境好有愛,爸爸媽媽好傳統、講尊卑;從來唔打我,但係會同我講道理、會俾一定嘅自由我,但又同時要我有責任感同底線;哥哥大我三年,我嘅成長歲月好多畫面都有佢份,感情好到不得了,依家我都係叫佢『哥哥』,搞到俾朋友笑……我想俾個仔嘅就係咁簡單,有適當教導、有充份自由、孝順父母、成長又有兄弟姐妹陪伴分享,我相信只要有愛包圍,小朋友就一定唔會學壞!」

image6

愛護中要適當放手:Quality Time勝於一切!
張達倫和別的新手爸爸一樣,勁秋雞還沒出世,已經看了不少育兒書、做過不少功課,資迅發達各有一套說辭時,他決定採取中庸之道:「BB時期應該點湊佢,人人都有一套講法,有啲人話要抱、有啲人話唔好抱咁多,我同老婆覺得佢係男仔、就唔應該養成佢太依賴太嬌縱,由出世到依家,都堅持瞓覺擺佢上床自己瞓,養到依家喊得一陣,咪就識得自己擺個奶嘴落口、自己瞓囉!與其隨傳隨到、一扭就抱,我覺得父母同小朋友之間嘅Quality time仲緊要,我日日幾忙都好、就算返屋企得嗰三粒鐘,我都一定有起碼一個鐘,係放低電話同其他嘢,專心同佢玩、同佢傾偈。我同老婆呢方面好一致,希望佢學識自處、唔怕輸唔怕跌,愛佢,並唔代表要幫佢鋪晒所有路、一切都預備好。」

image4

image5

贏在起點不是最後勝利:唔想養成一代樓奴!
做了爸爸以後,在電視城裏和別的爸爸媽媽傾育兒經成為張達倫的日常。拍劇遇上郭晉安,就告訴張達倫,能力許可的話還是讓孩子讀國際學校更好:「我同意嘅!係因為香港嗰套教育制度呢幾年不停變,學童同家長都無所適從,小朋友讀書開心、連夫妻關係都少啲拗撬同磨擦,你話係唔係先?其實我由賣電腦到入訓練班,然後今年同無綫改簽普通約向外闖,一路行嚟都唔容易。我希望除咗書本上嘅知識,個仔長大後學到嘅係做人嘅能力同堅持。首先,要知道自己嘅興趣喺邊,喜愛就會鑽研、就會進步,否則做人只係為咗賺份人工、只係為咗供層樓,真係好可悲;第二樣嘢,係知道凡事都有個過程,做得好唔好、夠唔夠,要經常懂得反省,咁先至會進步、才會有成功一日。」

image1

image2

image3

想知更多育兒資訊 請留意Easy Pama

想隨時獲得更多親子資訊,就快啲like我哋Facebook啦!⁠⁠⁠⁠
推介內容
event_latest