又到咗報讀幼稚園同小一面試嘅高峰期,眼見坊間有大量相關資訊及分析,例如「揀happy school 定係催谷學校好」,「點樣“大包圍”入到心儀學校」等,令好多來不及消化呢啲訊息嘅家長,盲目追求「名牌」同「最好」。身為3個囝囡媽媽嘅我,想提醒家長們,要根據小朋友性格作出選擇,唔好三心兩意,唔好焦躁,唔好因為報讀學校,令屋企充滿壓力,從而影響親子關係。

有家長可能會話:「囝囡讀書好重要,唔緊張點得呀!」

我都係做人媽媽,明白嘅,不過如果家長們選校時太緊張,成日愁眉苦臉,小朋友一定感受得到,特別係選擇「大包圍」報校嘅家長,更要花大量時間準備面試,甚至逼迫小朋友做一啲佢哋唔願意做嘅事,萬一處理得唔好,影響咗日常生活,會令小朋友覺得返學,甚至讀書都唔係開心嘅事,就算最後如願成功入讀首選學校,心態及學習動機都容易出現偏差。

所以建議家長們盡早揀定一間認為適合嘅,就唔會因為三心兩意而煩。之前我只為兩姊妹報讀德望,細佬只報文娜雅拔,除咗因為我係德望校友,呢兩間學校都出名品德教育良好外,另一個理由,係3姊弟都有「開心果」性格,所以我想佢哋能夠平衡發展,能文能武(才藝),所以寧願唔催谷,令佢哋有快樂而充實嘅校園生活。

IMG_8785

德望係傳統名校,透過優質英語教學、鼓勵學生參與課外活動以及優良品德教育,多年嚟培育出眾多社會菁英。而文娜雅拔就係近年眾多家長嘅心頭好,因為該校校監李詠儀小姐嘅媽媽,係保良局蔡繼有學校嘅總校長劉筱玲博士,兩校教育理念好相似,同樣提供良好嘅環境,令學生愉快學習同培養出良好習慣。

IMG_8789

而且,上述兩間學校都係一條龍。成功入讀德望幼稚園,好大機會升上德望小學部及中學部;而成功入讀文娜雅拔,就好大機會升上保良局蔡繼有學校嘅小學部及中學部,令小朋友能夠喺穩定嘅環境,主動而快樂咁去學習,將來就能夠更好咁樣應對唔同嘅挑戰。

之前報讀學校嘅時候,難免都會有些少擔心,但我會換個角度諗,就算萬一唔好彩落選,喺香港,小朋友點都有書讀,無謂太擔心。更何況,古今中外都有唔少名人,年少時都唔係讀名校出身,最後都成為社會棟樑,人中龍鳳,所以「贏在起跑線」呢個講法,唔一定正確。

最後借用德望學校校長Sister Pauline嘅說話:「唔好盲目追求學校」、「喜樂、責任、身教、反省接納及鼓勵,助孩子成才」;以及保良局蔡繼有學校總校長劉筱玲博士所講:「小朋友係獨立個體,有佢自己嘅天賦同性格。」希望能夠幫助家長們放鬆心情,並以小朋友嘅性格出發, 報讀適合佢哋嘅幼稚園同小學。

祝大家好運!

想知更多育兒資訊 請留意Easy Pama


fionaFiona
育有Keicy、Kassy同Par Par嘅我,3姊弟有晒小學、幼稚園同playgroup經歷,四年抱三令我一次過「儲齊晒」其他人喺唔同時間經歷嘅事,亦因為有好多人問我育兒、揀學校等資訊,所以我將三個囝囡嘅成長片段同點滴,透過 blog同Facebook Page開心share!我唔係咩都識,唔係一個完美媽媽,但我盡全力令3姊弟有完美嘅童年生活,希望將來我老咗嘅時候,可以同佢哋一齊笑住講返舊時啦!

連結﹕Keicy Wu 胡梓盈

入讀心儀學校的讀心術
想隨時獲得更多親子資訊,就快啲like我哋Facebook啦!⁠⁠⁠⁠

Post navigation