喺城市長大嘅小朋友,平時多數出入屋企、學校、商場同興趣班,好少接觸大自然,所以上個星期日,我同3姐弟一齊出海玩水,同陽光玩遊戲,全程無拘無束、又笑又叫,仲得到唔少好處㖭!

WhatsApp-Image-2017-09-26-at-2.35.16-PM

吸收維他命D
3歲到7歲係身體發育嘅關鍵時期,骨骼發育更需要大量維他命D嚟幫助身體吸收鈣,缺乏維他命D,會導致兒童生長緩慢,所以出海同陽光玩遊戲就啱晒喇!不過,正午時陽光太猛,要盡量避開。

鍛鍊心肺功能
水嘅浮力、壓力以及水流,可以按摩小朋友身體表層嘅血管,加上全身肌肉耗氧量增加,令佢哋嘅心臟得到一定程度刺激,有效促進血液循環,亦令小朋友肺活量增加。

提高睡眠質量
水嘅按摩作用會令小朋友覺得舒服同放鬆,可以消除佢哋孤獨、焦慮、恐懼等一系列負面情緒,加上玩水會消耗體力,所以玩完水當日,3姐弟情緒穩定,睡眠質量更好。

WhatsApp-Image-2017-09-26-at-2.36.37-PM

想得到以上嘅好處,就要做足準備喇!
(一) 出發前
睇天氣報告,以免天氣唔好而掃興。
如果小朋友會暈車浪,上車前唔好食太飽,可以帶定酸梅、膠袋旁身,預防佢哋唔舒服或者嘔吐。
檢查小朋友身體狀況適唔適合落水,有感冒、發燒或者身上有外傷,都唔好落水。
(二) 帶備物品
1、防曬乳
小朋友嘅嬌嫩肌膚好易曬傷,除咗落水前要搽防曬乳,每次上水沖身後,都一定要再搽。建議唔好揀SPF超過50嘅防曬產品(美國FDA有規定)。
2、泳衣
要啱身、有彈性,方便活動,另外,泳衣嘅纖維網好密,容易滋生細菌,所以新買返嚟同著完之後,一定要洗乾淨。

3、衣服、毛巾
除咗帶定多一兩套衫,以備不時之需,因為挨晚海邊比較涼,所以要帶多一件薄褸;另外,小朋友每次上水,都要即刻沖身,以免海水入面嘅鹽分刺激皮膚,而大毛巾就可以抹乾身體兼保暖。
4、飲用水、飲品、食物

小朋友玩得high,消耗大,會成日嗌頸渴、肚餓,所以要準備多啲嘢食同水,不過唔好食甜嘢,因為越食越頸渴,我會準備容易入口嘅小食,例如三文治、壽司,又煲定啲五花茶畀佢哋飲,唔好剩係飲水咁寡。
(三) 做好安全措施
檢查水泡有冇入夠氣,兼有繩索綁實船邊,著上合規格嘅救生衣,我先至放3姐
弟落水,以免佢哋隨住海浪越飄越遠……

WhatsApp-Image-2017-09-26-at-2.36.32-PM

戶外活動 促進親子關係
只要花啲心思,就可以有精彩、好玩嘅親子戶外體驗,間中同小朋友一齊親親大自然,係雙方建立良好溝通嘅好機會,小朋友會對家長產生信任同依賴,而家長又可以喺囝囡成長教育中留低回憶。
趁十月份秋高氣爽,享受陽光海灘,藍天白雲啦!

想知更多育兒資訊 請留意Easy Pama


fionaFiona
育有Keicy、Kassy同Par Par嘅我,3姊弟有晒小學、幼稚園同playgroup經歷,四年抱三令我一次過「儲齊晒」其他人喺唔同時間經歷嘅事,亦因為有好多人問我育兒、揀學校等資訊,所以我將三個囝囡嘅成長片段同點滴,透過 blog同Facebook Page開心share!我唔係咩都識,唔係一個完美媽媽,但我盡全力令3姊弟有完美嘅童年生活,希望將來我老咗嘅時候,可以同佢哋一齊笑住講返舊時啦!

連結﹕Keicy Wu 胡梓盈

親子出海玩水 開心有益
想隨時獲得更多親子資訊,就快啲like我哋Facebook啦!⁠⁠⁠⁠

Post navigation