人人有SAY
【理財滿FUN】沒有數字的加減運算

「嗚哇,嗚哇哇……」有一日,四歲嘅女兒小飯糰,哭得呼天搶地咁走入屋,我見事態嚴重,馬上衝去睇吓。小飯糰哭哭啼啼嘰哩咕嚕講:「媽媽,奶茶唔見咗呀!嗚嗚嗚 ……」噢,嚇得我呀!原來由興趣班返屋企途中,佢跌咗嗰隻喺十蚊店買、半個手掌咁大嘅毛毛狗公仔。

紫晶心裏翻咗一個大白眼,心諗:「呢個寃家,唔見咗個爛鬼毛公仔,洗唔洗喊到肝腸寸斷?想嚇傻你老媽子咩!」但表面上我都要維持好媽媽形象,馬上加以安慰呵護,仲即刻打電話去興趣班,睇吓會唔會揾得番,結果當然係冇咗啦!

後續係敎育環節,等小飯糰稍為冷靜後,媽媽爸爸一邊幫佢抺眼淚鼻涕,一邊灌輸理財觀念,例如珍貴嘅嘢要小心收藏,冇必要唔好帶出街,特別強調損失唔一定可以補救。當小朋友逐漸長大,佢哋要負責保管嘅金錢財物越嚟越多,所以謹慎嘅態度要從小培養。

因為小飯糰失去寶貴嘅小狗公仔呢種感覺好強烈,以後對於重要嘅財物,例如手機銀包,佢都冇試過唔見。(反而自己久不久會丟銀包,真慚愧!)

呢件事亦令紫晶反思,小朋友眼中嘅財富同大人唔同,我地同佢講理財,應該由佢地認為珍貴嘅物件開始。幼稚園階段,唔使心急教數銀紙,可以先教數值嘅觀念。之後,紫晶設計咗一啲敎育遊戲,同佢嗰十幾隻小狗公仔有關。其中一個遊戲喺咁:

對象:幼稚園小朋友
用具:小狗毛公仔十數隻、有蓋紙箱一個
目標:數量及加減運算

遊戲方法:
1.爸爸先將1隻小狗公仔放入紙箱,然後叫囡囡猜紙箱內有幾多隻小狗,如果估中,當然要拍掌讚美一番。
2.到囡囡放1隻小狗入紙箱,媽媽猜數量,媽媽此時在紙上畫1隻狗,再寫數學符號「+」,再畫多一隻小狗,然後講出答案「兩隻小狗」。打開紙箱揭曉答案,順便在紙上寫下「=」和畫兩隻狗。
3.論到媽媽放小狗,爸爸猜,如此類推。
4.呢個遊戲嘅重點係將行為同語言轉化為數學符號,令幼童不知不覺間理解數量、加數規則、數學附號等。放入小狗公仔嘅數量要由1做起,按程度增加數量。如果達到一定程度,可以不再畫公仔,改用數字代替,最後甚至不用寫出數字,純用心算。
5.學習減法時,只要將遊戲逆轉,喺紙箱內拿出狗仔後再猜答案即可,重點同樣是先畫圖,再改為數字,再心算。

大槪幼童都喜歡猜估遊戲,小飯糰好鍾意呢啲遊戲,加上爸爸媽媽誇張搞笑嘅表情、不吝嗇嘅讚美,阿女玩得樂此不疲,好容易已經學識加減數。之後我哋仲利用小狗玩分組遊戲、小狗分糖果、小狗生BB,以學習乘除運用,小飯糰喺上學前已能處理簡單加減乘除混算。

14660486透過遊戲來學習不同知識,是教育孩子的最佳方法。

紫晶寫親子理財希望雙線發展,一方面向父母分享有效方法,盡早達到財務自由。另一主線係教小朋友理財,通過有趣嘅活動,讓子女學習理財幾大範疇:理財觀念、賺錢、花錢、儲蓄、投資、債務、慈善、財富承傳等,最重要以小朋友角度出發,令佢哋學習之餘,充滿快樂。家長可發揮創意,參考並修改以上遊戲,設計適合自家小朋友的活動。


李紫晶PROFILE-PIC
撰文:李紫晶
40幾歲土生土長,經常笑口常開嘅樂天派師奶,除咗食同瞓,最大嗜好係搞搞女兒嘅敎育同埋理吓財,最大幸福感亦係要財政無憂加女兒品學兼優。李紫晶將用心跟讀者分享親子理財,激勵大家靠自己創造樂融融的美好生活。

 

 

📣相關閱讀
▸ 點解唔買教育基金?  http://bit.ly/2Ospmrv
▸ 小朋友賣廢紙 都可以學到資產增值?  http://bit.ly/2OLi4vX
▸ 小朋友想財務自由 最緊要識儲「雙優資產」?  http://bit.ly/2wY84I9
▸ 親子理財必學:「不勞而獲」 http://bit.ly/2wY4I81

 

想知更多育兒資訊 請留意Easy Pama

想隨時獲得更多親子資訊,就快啲like我哋Facebook啦!⁠⁠⁠⁠
推介內容
event_latest