人人有SAY
【港媽的第二生活】應該為施政報告增加產假開心?

1

施政報告出爐,一如外界預期會增加產假,由10周增至14周,額外四周的支出會由政府承擔,只要該婦女月薪不超過5萬元。媽媽平台也一如所料地被此消息洗版。

開心,點會唔開心啊?不過又何必太開心呢?首先,14周的標準早在2000年,國際勞工標準的《保護生育公約》已經提出。足足18年,香港才在施政報告中推出,雖即日生效於政府轄下女性僱員,惟未有立法時間表強制私人企業執行。結果?隨時等多三年先享受到。然而,標準只會越趨人道,是大勢所趨。我為此文作資料搜集時,已見部分以14周為法定產假的歐洲國家,如瑞士,有聲音認為,既然世界衞生組織建議婦女純母乳餵哺孩子至六個月,14周產假明顯太少,亦是令媽媽難以投入職場的原因。可見,香港的媽媽們,妳們是被剝削了18年,現在只是還給你應得的四周。仲未計有關建議又會被廿蚊張此流的老細,重覆又重覆指自己是在彰顯大恩大德,讓妳放根本唔需要放的假。

記住,呢四周,妳應得的!

跟住講到呢度,實有人走出來指住我罵:「你地班女人畀你又嫌少,唔畀你又話人無良。做人知足啲啦好無?」嘩,真係多謝提醒。你一萬蚊人工,幾十年唔加,之後加4000蚊畀你,但通脹已經由10蚊飯變成70蚊飯,你知唔知足?媽媽面對緊嘅通脹,咪就係政府狂谷母乳餵哺,樓價係咁升,按揭越黎越難做,退休年齡越來越高,意味著新手媽媽其實越來越忙,環境越來越差,經濟壓力越來越大,幫手越來越少。有多4周我只能夠樂天知命,但更應該做的,是盡快落實起碼七天男士侍產假,增強社區育兒與託兒設施,立法上要求僱主推行家庭友善政策,那才是真正從女性角度出發的觀點。

再講,14周的標準存在多年,就算有爭議,負面批評也難站得住腳。特首林鄭月娥講到自己是首位女行政長官,所以要推動婦女發展。哪為何不是在第一份施政報告就提出呢?每份施政報告,總有豬頭骨總有甜頭。我傾向陰謀論的解讀,就是此類婦女發展措施是甜頭,一早儲埋一罐,等要推出豬頭骨時,一次過倒一罐糖出來。豬頭骨係咩?明日大嶼是也,那個講就話3、4000億走唔甩,但睇往績隨時成萬億埋單的人工島計劃。庫房就得一萬一千億,起完幾乎就乾塘。數數手指,人工島隨時起超過廿年,工程超支似乎是意料之內,再隨時可能面對天災,到時香港咁慘,內地又可以複製沙士推自由行模式,做「白武士」啦?配合埋「50年不變」,搞掂!港媽們為何要CARE啊?因為那時,你的子女正值盛年。


港媽的第二生活

撰文:陳栢晞Venus
曾於電視台新聞部工作,現為全職媽媽,兼職打理Facebook專頁「港媽的第二生活・Every mom needs a second life」,努力寫出媽媽心聲。

 

 

📣相關閱讀
▸【港媽的第二生活】致那些瞧不起人的母乳媽媽  http://bit.ly/2Np9YHR
▸【港媽的第二生活】別拿我的BB比較  http://bit.ly/2NtwZcY
▸【港媽的第二生活】別教孩子低估大自然的威力 http://bit.ly/2NrAkce
▸【港媽的第二生活】你自私,你的孩子只會更自私 http://bit.ly/2xfU1hh

 

想知更多育兒資訊 請留意Easy Pama

想隨時獲得更多親子資訊,就快啲like我哋Facebook啦!⁠⁠⁠⁠
推介內容
event_latest