人人有SAY
【理財滿FUN】求學經費大貶值?

1

上期分享咗點樣為小朋友儲教育經費,但係去外國留學,有一樣嘢好緊要,千祈唔好忽視,嗰樣就係匯率!大家睇吓過去12年英鎊、澳元同加元嘅匯率波幅:

過去12年主要留學地區滙價波幅
EasyPama_m_Table-06

睇完有冇嚇大家一跳?從上表可見,滙價波幅可以好大,如果處理不善,辛苦儲蓄嘅教育基金,可能因為滙價攀升而貶值,價值打個七折、甚至六折。萬一小朋友已經喺外國開始學業,父母唯有焗住上,到時壓力更大。紫晶就有個老友喺澳元兌港元不斷創新高嘅期間,供個仔去澳洲讀書,最後失咗預算,要將自己喺香港住緊嘅樓加按套現,先至可以幫個仔完成學業。

相反,另一個老友知道個女諗住去英國留學後,要使好多英鎊,所以一早已關注英鎊滙價。佢趁英鎊上升週期初期,喺倫敦買咗一套兩房房子。當個女去讀大學嘅時候,一個房畀阿女住;另一個房租畀佢同學,收嘅租金已經夠個女生活費。阿女大學畢業後,層樓又升值咗好多,老友賣咗間樓,賺到嘅錢已多過個女嘅學費!呢個就係「以房養學」嘅概念。

所以,如果諗住畀仔女去外國留學,應盡早決定留學目的地。最好可以有10年時間準備,一定可以捕捉到匯價相對低位,為留學儲多啲彈藥。最簡單嘅做法,就係「懶人投資法」,即係定期定額平均投資。呢個方法可以避免摸頂買貨蝕最甘(紫晶仲有一個老友係1英鎊兌15港元時換咗大量英鎊畀個女留學,現在仲經常唉聲嘆氣!),但同樣唔可以喺最低位買入賺到盡。

如果想更精準,紫晶會以「標準差」作參考,例如2016年時,1英鎊兌9.6港元,係36年嘅低位,已經超過兩個標準差,統計學上表示匯價有九成半機會回升。如果明知日後有用,當然要儲番多少。儲蓄咗嘅外幣,可以用嚟買啲派息穩定嘅資產,同之前介紹過嘅「雙優資產」差不多,但以外幣計價,繼續有升有息。

講咗三期點樣幫仔女籌措救學經費,下星期開始紫晶會返去另一主線,分享如何教導小朋友理財。

(本文只提供一般資訊,它不構成購買任何投資邀請或建議)。


李紫晶PROFILE-PIC

 

撰文:李紫晶
40幾歲土生土長,經常笑口常開嘅樂天派師奶,除咗食同瞓,最大嗜好係搞搞女兒嘅敎育同埋理吓財,最大幸福感亦係要財政無憂加女兒品學兼優。李紫晶將用心跟讀者分享親子理財,激勵大家靠自己創造樂融融的美好生活。

 

 

 

📣相關閱讀
▸ 去外國讀書要點儲錢? http://bit.ly/2PlvoYi
▸ 點解唔買教育基金?http://bit.ly/2OVv2ri
▸ 小朋友賣廢紙 都可以學到資產增值? http://bit.ly/2MHg0Dy
▸ 小朋友想財務自由 最緊要識儲「雙優資產」? http://bit.ly/2PjAzrC
▸ 親子理財必學:「不勞而獲」http://bit.ly/2CdH518

 

想知更多育兒資訊 請留意Easy Pama

 

想隨時獲得更多親子資訊,就快啲like我哋Facebook啦!⁠⁠⁠⁠
推介內容
event_latest