人人有SAY
【理財滿FUN】點解唔買教育基金?

18714264

喺香港,二人世界嘅甜蜜家庭生咗BB後就會唔同咗。屋企除咗多咗奶樽同玩具外,仲有樣嘢差唔多家家必備,就係「教育基金」。教育基金係為BB買嘅儲蓄保險。紫晶女兒一出世,都拿拿聲買咗一份,嗰陣時覺得唔買返一兩份教育基金,好似就唔係盡責嘅父母,直情對唔住個女咁。依家諗返起,除咗覺得自己好好笑之外,更重要嘅係發現教育基金呢樣嘢其實冇廣告講到咁有用。

保險公司收左家長嘅供款,會拎去投資,主要投資於固定收益嘅債券,亦會按經濟情況投資其他如股票類別嘅資產,但仍以債券為主,保險公司每年會將收益以分紅形式計入保單,然後本利滾存累積。教育基金另一作用係為BB提供人壽保險保障,但保障額就及唔上嗰啲冇儲蓄成份嘅人壽保險,可以提供到保費50倍以上嘅保障額。

不過,紫晶覺得投資同保險都係應該分開安排,投資要爭取最大嘅合理回報,保險最重要係保障要足夠,如果撈埋一齊做,隨時會兩頭唔到岸。如果要為家庭提供保障,應該幫家庭成員買純人壽、意外或者醫療保險,父母係家庭經濟支柱,更加要先幫自己購買。呢幾種保險因為冇儲蓄成份,保費支出會少過教育基金好多,慳番出嚟嘅錢,就可以用嚟買「有升有息」嘅雙優資產。

冇錯!紫晶唔鍾意教育基金最主要嘅原因係,相比其他資產升值潛力高嘅投資產品,佢嘅表現稍遜,雖然每年分紅滾存有「複息」效果,但始終債券呢類固定收益資產會局限總資產升值幅度,令財富增加嘅速度就遠遠落後於雙優資產。

假設買了教育基金,每月儲5,000元,預期每年4厘回報(參考坊間教育基金的普遍回報), 11年後總回報約28%。另一方面,同樣每月用5,000元,買入一隻派息穩定兼業績增長嘅藍籌股,參考《蘋果日報》財經專欄作家股榮今年5月的文章結論,月供中華煤氣11年總回報(股價升值加派息及紅股)達70%,比較兩者,月供煤氣每年平均回報超過8%,遠勝月供教育基金。

觀看上述例子,可見煤氣的回報足足比教育基金多一倍。錢!用咗嚟買教育基金,就會削弱購買雙優資產嘅能力,所以除非覺得自己毫無儲蓄能力,要買份保險迫自己儲錢,倒不如將供保險嘅錢,用嚟月供股票。除咗煤氣外,工商銀行市盈率得六倍,派息有五厘,收益更好,總之儲好股好過儲保險。

(本文只提供一般資訊,它不構成購買任何證券或其它投資產品的邀請或建議。)


 

李紫晶PROFILE-PIC
撰文:李紫晶
40幾歲土生土長,經常笑口常開嘅樂天派師奶,除咗食同瞓,最大嗜好係搞搞女兒嘅敎育同埋理吓財,最大幸福感亦係要財政無憂加女兒品學兼優。李紫晶將用心跟讀者分享親子理財,激勵大家靠自己創造樂融融的美好生活。

 

 

 

 

📣相關閱讀
▸小朋友賣廢紙 都可以學到資產增值? http://bit.ly/2OLi4vX
▸小朋友想財務自由 最緊要識儲「雙優資產」? http://bit.ly/2wY84I9
▸親子理財必學:「不勞而獲」http://bit.ly/2wY4I81

想知更多育兒資訊 請留意Easy Pama

想隨時獲得更多親子資訊,就快啲like我哋Facebook啦!⁠⁠⁠⁠
推介內容
event_latest