人人有SAY
【理財滿FUN】小朋友想財務自由 最緊要識儲「雙優資產」?

理財唔係淨講錢,仲包括好多唔同資源,好似我哋身邊嘅小人兒,可以蛻變為無限可能嘅人才資源,所以我哋先會咁用心去培養佢哋,特別關注佢哋嘅教育,紫晶亦因此發現香港讀書嘅課程唔夠實用,照顧唔到小朋友需要。

幼兒至小學階段,除咗中英數之外,最應該學嘅係「學習方法」(Learning Skill),例如敎小朋友點樣用MindMap學習、運用聯想法記憶資料、點樣聯繫各門知識等,呢啲對學習好有幫助,可以話終身受用。咁有用嘅方法,點解唔先教小朋友?反而趕住將各門學科知識塞入佢地嘅腦袋?

紫晶睇到呢啲漏洞,於是從小教導女兒Learning Skill,學嘢容易咗,成績自然好;成績好咗,又會喜歡學習,咁樣就唔駛安排各種補習班,慳錢慳時間,呢啲正係理財嘅重要技巧。

所以唔好笑我哋係直升機家長,樣樣都要為小朋友考慮,因為我哋要靈活走位,學校教得唔夠嘅地方就由家庭補上,面對搵食越嚟越難嘅社會,理財已經變成另一種生活技能,學校冇得學,亦唯有自己教。

EasyPama_m_Resize_640

上期講到,理財最終目標係不勞而穫,即係唔駛打工,單靠被動收入(例如買樓收租、買股收息等),已經可以滿足生活所需。年輕父母可能覺得呢啲係遙不可及,但只要通過切實可行方法,加埋及早開始,係可以做得到嘅!

例如小女六歲的時候,佢嘅兒童銀行戶口存左八萬幾蚊利是錢,啱啱遇上08年金融海嘯,好多股票跌到四腳朝天,當時我將佢啲利是錢全部買入中國銀行,每股1.9元。十年過去,每年收到的股息早已經將成本收回,而中國銀行現價3.4元(52周高位係4.96元),不單每年都有息收入,仲可以享受資本升值,是女兒第一項被動收入呢。我每年都同個女檢討下呢項投資表現,再存定期比較,回報嘅分別隨時間過去會越嚟越大,依家小女已經明白理財嘅重要性!

所以只要時間夠長,只要我們懂得選擇同配置資產,幫仔女從小籌劃理財,再教埋佢哋正確方法,廿年後當佢哋大學畢業,應該已經踏上咗財務自由之路,終點可望。

從營營役役工作到享受不勞而穫嘅成果,紫晶做嘅都係「儲蓄」呢類「雙優資產」,下次我會再同大家分享多啲仲有乜野資產係「雙優」。


李紫晶PROFILE-PIC
撰文:李紫晶
40幾歲土生土長,經常笑口常開嘅樂天派師奶,除咗食同瞓,最大嗜好係搞搞女兒嘅敎育同埋理吓財,最大幸福感亦係要財政無憂加女兒品學兼優。李紫晶將用心跟讀者分享親子理財,激勵大家靠自己創造樂融融的美好生活。

 

 

📣相關閱讀
▸ 【理財滿FUN】親子理財必學:「不勞而獲」http://bit.ly/2wY4I81
▸ 【兒童理財】幾歲要開始畀零用錢?畀幾多?點樣畀?http://bit.ly/2x12hl5

想知更多育兒資訊 請留意Easy Pama

想隨時獲得更多親子資訊,就快啲like我哋Facebook啦!⁠⁠⁠⁠
推介內容
event_latest