人人有SAY
【理財滿FUN】親子理財必學:「不勞而獲」

好高興可以在EasyPaMa同讀者見面!編輯要求紫晶寫親子理財,對象係幼稚園同小學生(呢個好合理,因為仔女上咗中學,只有你想親子,佢係唔想畀你親)。紫晶之前寫咗一輪理財專欄,仲做過理財講座,但加咗「親子」兩個字,覺得要「升呢」!因為我要教大家理財,等大家將方法教畀小朋友,真係又有挑戰性,又有趣!

馬上入正題!親子理財第一步,請身為家長嘅你,想想自己嘅理財觀念,究竟係乜嘢?可能有人即刻O咀,有人會答「量入為出」呢啲財政預算案用咗幾十年都唔變嘅四字詞。係好高大上,但教唔到小朋友,實用性好低。

觀念呢個問題太抽象,貼地啲檢討吓,身為家長嘅你,點樣運用屋企嘅金錢呢?做定期?(有人聯想到堅離地嘅劉先生)買外幣收息?(如果係人民幣,就……)問number買股票?(如果喺三萬三樓上買,係驚慄片級數)

真心講,單靠任何一招係理唔到財,更加教唔出小小理財高手,情況等如要求小朋友唔好睇電視努力讀書,但自己晚晚好似蛋黃哥咁攤喺電視機前面,咁樣做,成功率好低。所以,親子理財第一步:家長應先建立自己嘅理財觀念同目標,先至可以教畀仔女。

至於紫晶嘅理財目標,簡單版就係四個字:「不勞而獲」,完整版係:理財係一種資產配置嘅能力,通過腦力,因應經濟變化調配資產,選擇回報與風險最佳嘅配搭,目標係財務自由,即係單靠被動收入可以滿足生活所需,唔打工都冇問題。

1


 
李紫晶PROFILE-PIC

 

撰文:李紫晶
40幾歲土生土長,經常笑口常開嘅樂天派師奶,除咗食同瞓,最大嗜好係搞搞女兒嘅敎育同埋理吓財,最大幸福感亦係要財政無憂加女兒品學兼優。李紫晶將用心跟讀者分享親子理財,激勵大家靠自己創造樂融融的美好生活。

 
📣相關閱讀
▸ 電視洗腦廣告 對小孩影響不容忽視 http://bit.ly/2oz8kJN
▸ 幾歲要開始畀零用錢?畀幾多?點樣畀?http://bit.ly/2MqbXjM
▸ 畀零用錢切記要真金白銀 約法三章 http://bit.ly/2MsG1eA

 

想知更多育兒資訊 請留意Easy Pama

想隨時獲得更多親子資訊,就快啲like我哋Facebook啦!⁠⁠⁠⁠
推介內容
event_latest