人人有SAY
鄭萃雯(下):四個字:為母則強!

孖B是意外驚喜,擔驚受怕37週,終於一切有驚無險,鄭萃雯於16年元旦、踏入37週第一天陀足月可以入院催生,卓言和卓喬兩兄弟相隔一分鐘、足晒磅來報到。當然捱過孕期,養育成人才真正是一生的事業。兩年多來經歷過種種,鄭萃雯也從手忙腳亂,到經驗豐富,所以今年書展,她結合專科醫生意見和自己的實戰經驗,寫成新書《兒童健康傾醫啲》,分享自己的一套育兒經。

image1

image2

黐身爭寵 「廝殺」列車
生仔頭一年,鄭萃雯堅信湊仔不用假手於人,同時也可以兼顧電視台主播工作,結果不請陪月、不請外傭,真的單打獨鬥全靠自己:「每日三、四個鐘仲要分開進行的睡眠時間,搞到我長期熊貓眼,捱過頭三個月,終於開始上軌道、戒夜奶,以為可以舒服小小,點知兩個又一齊發濕疹,兩公婆夜晚就要一人睇一個同孖仔一齊瞓,唔係第二朝一定抓到成面、成個枕頭都係血。去年離開電視台,自己做自由工作再寫書,請埋工人姐姐幫手,日子一樣冇變輕鬆。兩兄弟會爭寵、爭玩具、爭媽咪,一入房就好似《廝殺列車》一樣不停拍門呼叫,所以寫稿工作盡量都要離家至做到。忙亂中其實都開心亦都成為生活日常,早排兩兄弟有一個生病送去我媽咪度隔離,反而覺得太輕鬆好唔慣:呢個瞓咗,點解冇第二個嘈呢?做媽媽呢兩年幾,咪就係激發咗女人小宇宙,體驗到四個字:為母則強囉!」

image3

image4

一路不易 勿忘初衷
正是因為一路走來都不容易,到了兩兄弟適齡是時候要報幼稚園,鄭萃雯反而更堅定認為要孖仔快樂健康成長,做虎媽谷成績不如為孩子培養好習慣和人格:「幼稚園我揀咗同區嘅,無謂為咗名校瞓少啲去跨區返學,再講每個孩子天性資質都唔同,夾硬入名校跟唔到進度,打擊自信咪更加學唔到嘢?我平時好少買玩具,孖仔做得好,通常都係用書本獎勵,電子奶嘴從來都戒絕,學習應該係從書本中自己培養興趣去吸收。呢幾年經歷話俾我知,做人樂觀、識得感恩比任何嘢都重要,每日返屋企都會問吓佢哋今日最開心係做咗啲乜……recall番佢哋開心回憶之餘,亦都想佢哋從而學識點樣令自己快樂。我唔係專家,所有經驗都係做咗媽媽以後,審視自己成長,然後把自己一套、覺得好的東西放在佢哋身上。快樂係一種氛圍、會感染別人亦到影響所有嘢成果,希望佢哋都似媽咪一樣,做個樂觀知足嘅人。」

image5

image6

 

想知更多育兒資訊 請留意Easy Pama

想隨時獲得更多親子資訊,就快啲like我哋Facebook啦!⁠⁠⁠⁠
推介內容
event_latest