人人有SAY
康子妮(下):每個孩子都是獨特的!

別人家的孩子十多歲才踏入反叛期,康子妮笑言,大仔林寶兩歲已經話要離家出走:「我好記得佢唔知同爸爸阿Lo嘈完,兩歲人仔,著住條片、踢住對拖,行去門口話要走出呢個家門喎……林熙呢,就細細個已經情緒波動好大,肥肥白白得得意意,但係兩歲已經冇人敢抱佢。做父母就係應該要搞清楚佢哋點解會咁做,後尾find out,林寶唔鍾意聽,學習教育要結合睇同實踐;而林熙小時候係因為腸仔唔舒服又唔識表達,好幸運曾經遇到好老師願意花成堂時間同佢傾偈、問佢點解。」

1

2

林氏宗親表演系 又有新成員加入
除了編譜和樂手工作、近年開始網店和代購生意,康子妮也是教會中堅份子,擔任教會樂隊領班,兩個兒子也是成員,林寶做主音、林熙負責彈結他:「家族入面好多人從事演藝工作,係唔係兩兄弟就有遺傳基因、又口齒伶俐呢?我又覺得唔係喎,林寶同林熙講嘢唔算叻,不過林寶好有表演慾、林熙呢一刻話大個想夾band做rock友。返教會除咗崇拜、侍奉同玩樂隊以外,我好開心兩兄弟都主動擔當咗好多工作,負責幫手照顧一班零至四歲的小朋友,培養咗一份責任感。做得好時我會讚,冇交待時我都會鬧。學習唔係只限於學校,待人處事、責任心係要由生活日常慢慢滲透令佢哋知道點樣做得更好、如何更為人著想。都係嗰句,人生好長、每個人長處都唔同,做人做得好,邊個仲會斟著佢三、五年班有一科唔合格?」

3

4

結朋交友的重要性 放心交畀伊健教仔
從來不會打罵孩子、從小就堅持講道理,不過兩個兒子開始長大,康子妮也明白有時候父母說得太多,孩子吸收有限會適得其反,這就是好朋友們草蜢、伊健出動的最佳時機:「有啲嘢淨係父母一味囉嗦係冇用,所以身邊有一班好朋友好緊要。父母講多兩句,仔女就覺得煩,但係玩uncle同佢哋傾,佢哋會更加尊重、說話更容易入腦。阿智(蔡一智)好鍾意同班男仔玩同傾偈,玩得埋又有新鮮感,自然容易入腦啲;伊健份人你唔好睇佢鍾意玩,其實興趣多多佢玩每樣嘢都好認真。有時同阿仔切磋變魔術心得,又會教佢表演魔術一定要『懶係勁』喎……當你知道教會、朋友圈都係一班各有所長、理念相同的人,就會放心、放手畀兩個仔自己去觀察、自己去吸收。」

5

 

想知更多育兒資訊 請留意Easy Pama

 

想隨時獲得更多親子資訊,就快啲like我哋Facebook啦!⁠⁠⁠⁠
推介內容
event_latest